Health Care Scheme-a inziak lut an pung

Mizoram State Health Care Scheme (MSHCS)-ah kum 2020-21 atan chhungkaw 1,13,720 an inziak lut a, kum hmasa 2019-20 aiin mi 52,705 (86.38%)-in an tam zawk.

MSHCS atana inziak lut hi kum 2019-20 ah chhungkaw 61,015 an awm a, Aizawl district-ah tam berin chhungkua 38,469 an awm a, an tlemna ber Siaha district-ah chhungkaw 1,631 an awm.

Kum kal mek 2020-21 ah chuan chhungkaw 1,13,720 an inziak lut a, chu'ng zinga 56,822 chu Aizawl district-a mi an ni. Inziak lut tlemna ber Mamit district-ah chuan chhungkua 2,230 an inziak lut.

District pariat zingah Serchhip district chu inziak lut pun tamna ber a ni a, kum 2019-20 aiin kuminah 276.17%-in an pung. Aizawl district-ah kum hmasa nen khaikhinin inziak lut zat punna a tlem ber a, 47.71%-in a pung a ni.