AMC-in ram a lei chungchangah MPCC-in Lokayukta-ah FIR thehlut

Mizoram Pradesh Congress Committee (MPCC) hnuaia Vigillance department chuan Aizawl Municipal Corporation (AMC)-in ram a leinaah thil dik lo a awma an hriat avangin February 15, Thawhṭanni khan an secretary Lalthanglawra Ngurte hmingin Lokayukta-ah FIR an thehlut.

MPCC Vigilance-in FIR-a an ziah danin, kum 2018 khan AMC chuan AMC park siam nan Ailawngah Rinsangpuia s/o Seichhunga (L) ram (VC Pass no. Nil, date 5.4.2009) chu Rs. 98,00,000-in an lei a; ram inleisak danah hian thil fel lo (corruption) tam tak a awm ngei niin MPCC chuan an ngai. Ram lei chu AMC record-ah Rinsangpuia s/o Seichhunga (L) ram a ni a, ram man chu Rochanmawia, Upper Republic-in Rs. 40,00,000 a dawnga hriat a ni.

Ailawnga ram leinaah hian Rochanmawia periodic patta no. 401005/10/419 of 2012 a nih thu ABCD notice tàrah hmuh tur a awm thu MPCC chuan an tarlang.

Solid Waste Management Centre atan Sihphir Neihbawia Zahmingliana s/o Siamhrima (L), Sihphir Neihbawi ram (VC Pass no. 119/99 of 1999 dated 3/7/1999, Phulzau rama mi) AMC-in Rs. 64,00,000-a a leinaah pawh thil dik lo a awma an hriat thu an tarlang a; "Zahmingliana hian a ram hralhna man chu Rs. 25,00,000 a nih thu a sawi a, hei vang hian Rs. 39,00,000 a chingpen ta niin a lang," an ti.

MPCC Vigilance department chuan, AMC-in Ailawng leh Sihphir Neihbawia ram a lei danah corruption awm ngeia lang chu chhui chhuak tur leh thil dik lo titute dan anga hrem turin Lokayukta Chairman an ngen a ni.