Lunglei Municipal Council siam tum

UDPA department enkawltu Tawnluia, deputy chief minister chuan, Lunglei Municipal Council siam turin sorkarin ruahmanna a nei niin a sawi a, "Cabinet-ah pek luh a ni ang," a ti.

Vanglaini palai zawhna chhángin Dy. Chief Minister chuan, Lunglei Municipal Council din turin department-in ruahmanna a siam vek tawh thu a sawi a, "Cabinet memorandum buatsaih a ni tawh. A boruak en chung zelin financial year tharah chuan kan ruahmanna hi Cabinet-ah kan pu lût ang a, an pawm ngei ka ring. A chhan chu, kan election manifesto-ah 'Municipality a theih ang angin din chhoh zel a ni ang' tih hi tihpuitlin ngei kan tum a ni," a ti.

Tawnluia chuan, sorkarin AMC tihhmasawn zel a tum thu sawiin, "Chumi atan chuan kan inbuatsaih. Thawktu indaih loh avangin kum 2019 khan post 96 siam niin, hnawhkhah vek tum a ni a, Covid-19 avangin kan ti thei lo. Kum tharah chuan hnawhkhatin, AMC tihphuisui deuh deuh a, an thawh tur pawh pek belh zel kan tum. Thawh tur pek belh tur chuan tihphuisui leh tihhmasawn a ngai a, chumi atan chuan kan inbuatsaih zel a ni," a ti a; AMC tihphuisui zel an nghahhlelh thu a sawi.