Myanmar-a bus service turin Ministry of External Affairs lehkhain la dawr lo
Mizoram sorkara Transport Minister chuan Mizoram leh Tahan, Myanmar inkarah khualzin phur bus tlantir a nih theih nan hma a la a, sorkar laipui hotute pawh a sawipui tawha sawi a ni. Chutih laiin, bus service tur chungchangah hian Ministry of External Affairs nen lehkhaa indawrna tun thlengin a la awm lo.
Mizoram leh Myanmar (Tahan leh khaw dang pawh) inkarah direct bus tlantir tumin Transport department hmalak dan RTI Act hmangin zawh a ni a; Transport department-in hma a lak tawhna te, a thlen chin te, Ministry of External Affairs (MEA)-ah dilna a thlen leh thlen loh chungchangte zawh a nih bakah, MEA-ah dilna a thlen tawh chuan dilna lehkha leh MEA-in a chhânna leh photo copy (xerox copy)-te dil a ni.
Transport department chuan, "Lehkhaa indawrna a la awm lo," tiin an chháng a; "Mizoram to Tahan bus service tir hi tumna a awm a. He mi atan hian Minister, Transport-in Ministry of External Affairs pawh ṭawngkáin a dawr tawh a, anni hian Myanmar nena bus intlan tawn theihna turin hmalak an lo tiam a ni," an ti.
'Mizoram Transport department hmalaknain Mizoram leh Myanmar inkarah direct bus tlantir theih ni ta se, MST bus tlantir tum a ni em? Private bus/firm tan bus service tir ve theih a ni dawn em?' tia zawh a ni bawk a; Transport department-in hmalakna mumal a la neih loh avangin chhàn a ni lo.
Transport minister TJ Lalnuntluanga chuan June 19, 2019 khan Assembly session-ah, Mizoram leh Tahan, Myanmar inkarah bus tlantir tum a nih thu leh chuta tan chuan sorkar laipui pawh a inhawn thu a lo sawi tawh. May 3, 2019-a Mizo Hnam Rúna inkhawmah Mizoram leh Myanmar inkar bakah, state danga Mizote awmna khaw dangahte pawh bus tlantir tum a ni a, Tahan-a bus tlàntir turin sorkar laipuiah bawhzui mek a nih thu leh Union External Affairs minister Sushma Swaraj pawh a sawipui tawh thu a sawi tawh bawk.