Mizoramah Fit India Run huaihawt a ni
Fit India Movement pualin nimin zing karah khan Aizawl leh hmun dang ṭhenkhatah Fit India Run buatsaih a ni a, mi ṭhahnem tak an tel. Aizawlah chuan Lammualah hman a ni a, deputy chief minister Tawnluia bakah Sports & Youth Services (SYS) minister Robert Romawia Royte ten an hmanpui.
Fit India Run puala inkhawm, Lammuala neih chu SYS secretary H Lalengmawia'n a kaihruai a, chief secretary Lalnunmawia Chuaungo kaihhruaiin zirlai, Bharat Scouts & Guides, sport association hrang hrang aṭanga kal khawm mi 1,750 velte'n Fit India Movement thuthiam an chham rual.
Lammuala Fit India Run-ah hian kal khawmte chu Lammualah chu vawi hnih an tlân kual a, Mizoram sorkar pawmpui sport association 32 zinga member kal ṭhahnem ber, Mizoram Amateur Taekwondo Association hnenah lawmman Rs. 5,000 pek a ni.
Deputy CM Tawnluia chuan, India ram pum huapa Fit India Movement buatsaih leh chumi puala Mizoram sorkarin Fit India Run a buatsaih chu ṭha a tih thu sawiin, "SYS department kaltlangin Fit India Movement hi Mizoramah kalpui a ni dawn a, vawiin hi a bul ṭanna a ni. Fit India-in a tum ber chu, taksa leh rilru hrisel, ei leh in thianghlim, nunphung hrisel leh uluk neih hi ram hmasawn nan a pawimawh, tih a ni," a ti.
Tawnluia chuan, taksa insawizawi uar zawka kalpui leh hriselna kaihhnawih kawngah Fit India Movement chuan hma a la dawn tih sawiin, "Zirna-in hrang hrangah hmalak hmasak a ni ang a, sport lama talent neite hai chhuah pahin ram pumin hriselna lam hawiin ṭan a la dawn a ni," a ti a; ṭhalai tam tak, zûk leh hmuam leh ruihhloa tlân tur te, nun kawng dik lo zawh turte chhanchhuah nan a ṭangkai dawn thu a sawi.
Fit India Run-ah hian SYS minister Robert Romawia Royte pawhin thu sawiin, Mizoram sorkar chuan March 22, 2019 khan Fit Mizoram Movement a ṭan tawh thu leh Fit India Movement nen pawh tum inang a nih thu a sawi. Fit India Movement hi nimin chawhma dar 10 khan ram pum huapin prime minister Narendra Modi-a'n Indira Gandhi Stadium, New Delhi-ah a hawng a; kumin bika Movement thupui chu 'Physical health and mental well being' tih a ni.
Fit India Movement pual hian nimin khan Mizoram University pawhin University Grant Commission thu angin hun an hmang. MZU hian a huhoa kea kalna hun an buatsaih a, mi ṭhahnem tak an tel.