KHAWTHLIR

MPC sub-headquarters, Lunglei chuan MPC party an chhuahsan thu nimin khan an puang a, nimin khan MPC president hnenah an ban thu hi ziakin an thehlut. An ban chhan an tarlan-ah chuan, ZPM-in party pakhata inchhung lut tura MPC-te sawmna an pek chu,  'MPC executive committee-in ngaihtuah se,' tia sub-headquarters, Lunglei lamin rawtna an thlen chu headquarters-in ngaihtuah loin a hnawl a, executive commi-ttee  ko duh lotu leh, sub-headquarters thu ngai pawimawh duh lotu MPC party-a an awm reng  theih loh thu an ziak.

Aizawl West College Alumni Association chuan nimin khan Ai­zawl West College-ah Old Westian Day (Alumni Day) an hmang a; AWC aṭanga zir chhuak tawh mi chhuan-awm bikte hnenah chawimawina an hlan a, college library tih­changtlun nan lehkhabu 142 an pe bawk.

Pachhunga University College NSS Unit chuan nimin khan an college-ah blood donation camp an huaihawt a, Aizawl Civil Hospital tan thisen unit 181 an pe; a petute mipa 96 leh hmeichhia 85 an ni.

Darlawn khua village council pathum ṭang­rualte leh Joint YMA-te hmalaknain Darlawn khawtlang chuan an khuaa chenna in nei lo chhungkaw pakhat in tur an saksak. In sakna hmanrua leh ṭul zawng zawng chu Rs. 10,00,000 chuang nia sawiin, chu'ngte chu Darlawna V/C pathumte'n an thawh khawm a, Darlawn Mistiri Association leh mi tlawmngaite'n a sak hna an thawk a ni.

Vawiin Zirtawpni aṭangin Vaivakawn-Bazar Bungkawn via Dawr­pui Vengthar kawngah PWD-in concrete pavement hmanga kawng siam hna an thawh dawn avangin, hna thawh zawh a nih hma chuan kawngpuiah lirthei tlan theih a ni dawn lo. Thupek hian chhiatrupna thil, kângmei leh rîkrum kaihhnawiha duty, dan leh thupek pawimawh bika police leh magistrate duty-te chêt velna a huam lo ang.