Cheng nuai 13.99 hû ruihhlo tiral

Vairengte Joint YMA-in ruihhlo an man, cheng nuai 13.94 hû chu Vairengte khelmual sirah nimin khan tihral a ni a, Excise & Narcotics minister Dr K Beichhua-a'n a hmanpui.

Dr Beichhua chuan, kum 10 chhung NGO hruaitu anga ruihhlo donaa a lo tel ve tawhna aṭangin, NGO-a mahni lansarh tumnain rei a daih ngai lo tih a hriat chian thu sawiin, "Vawiina YMA-in ruihhlo a man khawm, an hâl ral te, sorkar leh YMA anga ruihhlo an do ṭhinte chu sêltu leh dotu ṭhahnem tak social media-ah an awm leh ngei ka ring. Chutiang karah chuan sorkar leh YMA chu a thawkho zel dawn a ni," a ti.

END Minister chuan, ruihhlo an hâl ralte chu YMA-in man lo se, thihna dár ri a tam phah a rin thu sawiin, "Hei vang hian kan ṭhalaite chhan nan sêlna karah ruihhlo doin ka ding zel dawn a ni," a ti a; ruihhlo do kawngah ram leh hnam chhanchhuahna a ni tia pên chhuak duh chu sorkarin a thawhpui zel tur thu a sawi.

Ruihhlo bâwiha táng mekte chhanchhuah nan sorkarin Social Defence & Rehabilitation Board a din thu sawiin Dr Beichhua chuan, "Seṭhawna ruihhlo ngaite enkawlna hmun tichangtlung turin hma chak taka lak mek a ni," a ti. 

Vairengte Joint YMA Kumpuan Committee chairman K Thangvela pawhin thu sawiin, "Vairengteah Police leh Excise checkgate awm mah se, luhka ṭhahnem tak a awm a ni," a ti a; ruihhlo an man ṭhinte chu duty awm lohna hmun aṭanga lutte a nih thu a sawi.

Nimina ruihhlo tihral tâkte chu zu ûm 322 (Rs. 3,50,000 man), heroin cap 2,032 (Rs. 10,16,000 man), NAB mûm 10 (Rs. 11,000 man) leh Alprozelam tlêp 15 (Rs. 1,500 man) a ni.