Court-in Tlungvel VC ṭhiahna a hnâwl; MNF-in thu dik lo an puangzar - MPCC

Congress party chuan, Mizoram sor­karin August 6, 2019-a Tlungvel Village Council a ṭhiah­na order chu dan loa thil tihah ngaiin Gauhati High Court, Aizawl Bench-in August 21, 2019-ah a hnâwl tih an tarlang a; High Court order chung­changah MNF party chu thu dik lo puangzarah an puh.

Mizoram Pradesh Congress Committee (MPCC) chuan, MPCC hian Mizoram sorkar chu a rang thei ang bera High Court thutlukna zâwm a, mipuite'n an aiawha rorel tura an thlan Tlungvel V/C-te hnenah thuneihna pe kîr thuai turin an phût.

MPCC press release tarlan danin, MNF kaihhruai Mizoram sorkarin Tlungvel V/C a ṭhiah dawnah danin a phût anga insawifiahna hun pek a ni lo a, chuvang chuan The Lushai Hills District (Village Council) Act, 1953 Section 25(1) bawh­chhiatna a ni a, High Court chuan Tlungvel V/C ṭhiahna order chu dan loa thil tih a ni tih puangin a hnâwl (set aside) ta a ni.

High Court order-a a inziah dan chu, 'The impugned notification dated 6.8.2019 passed by the Secretary, Govt. of Mizoram, LAD, dissolving the Tlungvel Village Council is found to be arbitrary and the same is accordingly set aside' tih a ni.

Mizoram sorkarin Tlungvel V/C ṭhiahna order a chhuah hnu, August 17, 2019-ah Circle Inspector (CI)-in Tlungvel V/C letterhead, seal leh account bute a laksak a; V/C ṭhiah­na order High Court-in a hnâwl hnuah pawh tun thlengin Mi­zoram sor­karin Tlung­vel V/C thil pawimawh a laksakte chu a la pe kîr leh lo.

Mizoram sorkarin Tlungvel V/C a ṭhiahna thupek High Court-in a ṭhiah ngei laiin, August 26, 2019-a MNF Gen. Hqrs. chuan an press release-ah, 'High Court hian sorkar order a ṭhiat ni loin, Tlungvel V/C-te hi ṭhiah an nih loh chhan tur sawifiah turin hun a pe mai zawk a ni,' an tih thu, MPCC chuan an tarlang.

Congress party chuan, MNF-in press release-a an tarlan chu High Court order-ah a lang lo tih sawiin, "Insawifiah tura hriattirna tihchhuah hi High Court tih tur a ni lo a, Mizoram sorkar tih tur zawk a ni. High Court thutlukna chungchanga MNF-in thu dik lo puangzar a, mipui rilru hruai sual an tum hi kan dem tak zet," an ti.