KHAWTHLIR

Zotlang Bial ṬKP, Aizawl chuan an din champha kum 25-na (Silver Jubilee) pualin February 29, Inrinni khan BCM Aizawl West Kohhran hall-ah Aizawl Civil Hospital tan thisen unit 56 an pe a, a petute mipa 46 leh hmeichhia 10 an ni.

Excise & Nar­cotics department chuan February 23 - 29, 2020 chhung khan rakzu litres 1933.28, zu bilhlai ṭin 870, zu siamna bel 18 sapzu (750 ml) bottles 173, sap zu (375 ml)  bottles, beer (650 ml) bottle 1, beer (500ml) cans 183, BEDC litres 66.2, heroin kgs. 1.161, ganja kgs.14.82 leh dan bawhchhia mi 57 an man.

Mizoram BJP chuan sorkar laipui scheme zirchianga tlangzarhtu tur leh Mizoram sorkarin a kalpui dan enzuitu tur 'Central Scheme Awareness and Monitoring Cell' an din. He cell hian central scheme hrang hranga state sorkarin hma a lo lak tawh ṭhin dante bakah Mizoram mipuite'n an hman ṭangkai lehzual theih dan turte an zirchiang dawn a, state sorkar hmalak­nate chu a ṭul anga tlangzarhin a endik pui ṭhin ang.

February 28, Zirtawp­ni khan Siaha Animal Husbandry & Veterinary department  chuan Porcine Reproductive Respiratory Syndrome (PRRS)  leh Classical Swine Fever (CSF) kai vawk 19 (inch 40 bawr vel) DVO Dr Sahlu khaila, SDPO David J Beidaolai, additional PP HC Vanunthanga leh lawyer Noel L Kompa te hriatpuiin an tihlum a, an phum nghal. Vawk tihhlum takte hi Myanmar aṭanga Mizorama lakluh an ni.

UPC NEI hnuaia district pathum - North Mizoram, Lunglei leh Barak district-te chuan February 27, Ningani zan aṭang khan district conference an hmang a, nizan khan a ṭiak. NMD conference vawi 70-na, Platinum Jubilee Conference hi Cultural Centre, Bawngkawn South-ah neih a ni a, thupuiah ‘Pathian thu hi a nung a ni. Hebrai 4:12'  hman a ni.