Airport mawi ber siam kan tum - Chief Minister

Lengpui Airport-a IndiGo thlawhna service thar lawmna hun Inrinni khan airport-ah hman a ni a, khuallian chief minister Zoramthanga chuan airport mawi ber siam an tum thu a sawi.

Zoramthanga chuan Lengpui Airport-in airline service a neih belh chu lawmawm a tih thu sawiin, "Mizoramin a chhawr ṭangkai hle ang. Guwahati nen a inkalpawhna service a awm belh mai bakah Lengpui aṭanga thlawhna route la awm ngai lo, Agartala khawpui pawh IndiGo-in an telh hi a lawmawm hle," a ti.

Lengpui Airport chu changtlung zawka siam turin hmalakna a kal mek zel thu Chief Minister chuan sawiin, "Airport lian ber chu kan siam thei lo ang a, airport mawi ber leh cute ber siam kan tum," a ti a, Lengpui aṭangin India ram khawpui direct flight a la awm a beisei thu a sawi. Indigo thlawhna service thar hi Aizawl to Guwahati leh Aizawl to Agartala service tur a ni.