October 1 aṭangin Bru refugee camp Tihtawp a ni tawh dawn - Home Ministry

Tripura refugee camp-a Bru awmte chungchanga din Joint Monitoring Group (JMG) member-te tun hnaia Ministry of Home Affairs pisaa ṭhukhawm chuan, Tripura refugee camp chu October 1, 2019-a tihtawp an rêl.

Meeting hi MHA special secretary (Internal Security) Dr AP Maheswari-in a kaihruai a; MHA chuan, September 2019 chhung ngeiin Tripura refugee camp-a Bru-te chu Mizorama hruai kir turin Mizoram Bru Displaced People Forum (MBDPF) hruaitute leh Mizoram sorkar hotute a hriattir.

Mizoram sorkar hotute chuan, Tripura camp-ah hian enfiah ngaite leh lêt duh hmingte chhinchhiah turin July 3, 2019 hian sorkar official tirh nghal an nih tur thu an sawi a; MHA pawhin, Mizoram sorkar official-te hnathawh dan an enpui tur thu an puang.

MHA hotute chuan, October 1, 2019 aṭang chuan Tripura refugee camp tihtawp a nih tur thu leh ṭanpuina an pek ṭhin zawng zawng pawh tihtawp a nih tur thu meeting-ah an puang a ni. Bru lak let hna hi July 3, 2018-a khatih hun laia Union Home minister Rajnath Singh hoa Mizoram sorkar, Tripura sorkar MBDPF-te’n draft agreement an siam anga kalpui tur a ni.

Meeting-ah hian, MHA aṭangin Special Secretary bakah joint secretary Satyendra Garg, under secretary A Radha Rani, Tripura aṭangin principal secretary Kumar Alok, Mizoram aṭangin Home secretary Lalbiakzama, OSD David H Lalthangliana, Central YMA president Vanlalruata, MBCC chairman Elvis Chorky leh refugee camp aṭangin MBDPF hruaitute leh civil society aiawh pahnih an tel.

•    Chhungkaw tin hnenah Rs. 4,00,000 pek tur.

•    Cash assistance kum hnih chhung thla tin Rs. 5,000 (kum hnih chhungin Rs. 1,20,000) pek.

•    In sakna tur (house building assistance) Rs. 1,50,000 ṭheuh pek.

•    Kum hnih chhung a thlawna ration pek.

•    Tripura aṭanga Mizorama an lêtna senso (transportation) Mizoram sorkarin a tum ang.

•    Bru-te dahna khuaah kum thum chhung anmahni vengtu tur special police officer pali ṭheuh dah.

•    Mizoram mi dangte ang bawkin an lo tur ram pek.

•    In an sakna tur ram ft. 40-a sei, ft. 30-a zau pek.

•    An awmna khuaah Eklavya Tribal Residential School hawn.

•    Permanent residential certificate leh tribal certificate pek.

•    Special Development Project siamsak.

•    Bank account hawnsak.

•    Aadhaar card leh ration card siamsak.

•    Mizorama lâk lêt tura enfiah tawh chhungkaw 5,407-a mi 32,876-te bakah, mi dangte enfiah nawn.