Mizoramah bank 27-in Branch 212 an nei mek

State Level Bankers Committee (SLBC) Mizoram chuan June 28, 2019 khan Secretariat Conference Hall meeting an nei a, chief secretary Lalnunmawia Chuaungo-in a hmanpui. He hunah hian Mizoram pumah bank chi hrang 27 a awm mek a, chu'ngte chuan branch 212 an nei mek tih an tarlang.

Meeting hi chief secretary Lalnunmawia Chuaungo leh State Bank of India (NE Circle) chief general manager Sunil Kumar Tandon ten an kaihruai a; kum 2018-19 financial year chhunga Mizoram chhunga bank-te'n mipuite hmasawnna atana hna an thawh chi hrang hrang leh loan pek dinhmunte thlir lêt a ni.

Meeting-ah hian - rural centre, mi 2,000 aia tlem awmna hmun zawng zawnga banking service pek dan tur ruahmanna hrang hrang te, financial year kal mek 2019-20 chhunga sorkar scheme PMEGP hnuaia mi 815 hnena margin money cheng vbc. 20.38 keng tel loan pekna tur leh, NRLM hnuaia self help group 1,153 hnena loan pek tur cheng vbc. 55.98 leh agriculture bank loan pek tur target cheng vbc. 520 chu an pawmpui.

Chief Secretary chuan, bank deposit leh advances inbûkna CD ratio chu state dangte aiin a la hniam hle tih sawiin, "A chhan chu bank-te'n loan an pek chhuah tlem vang a ni," a ti a; Mizorama bank awmte chuan state chhung mipuite hnena loan pe turin mawhphurna an neih thu a sawi.

Lalnunmawia Chuaungo chuan, bank ṭhenkhat, a bik takin private bank-te chu mipuite deposit dawng tur ringawt ni loin, state hmasawnna tura mipui hnena loan pek chhuah lamah hma la nasa lehzual tur leh mipui tana thawk tam leh zual turin a chah a, "Loan pe ṭha duh lo bank-te chu sorkar laipuiah thlen a ni ang," a ti a; bank-te chu loan an pek theihna turin thingtlang khaw pakhat ṭheuh adopt tur leh, an adopted village-ah chuan agriculture tan KCC loan leh self help group loan pe turin a chah a ni.

Sunil Kumar Tandon chuan, Mizoramah bank pali-te CD ratio chu 20% aiin a hniam tih sawiin, "Heng bank-te hian hma an sawn hle a ngai. Priority sector lending-ah chuan bituk aia tam 78.37% lai tlin a ni a, loan pek zinga a tam ber hi chu hemi lamah hian a awm a ni. Government sponsored scheme hnuaia loan chi hrang hrang pek chhuah danah, bank tam taking achievement an nei lo hi a ṭha lo hle a ni," a ti.

Meeting-a an tarlan danin, March 2019 thleng khan Mizoramah bank chi hrang 27 awmin, chu'ngte chuan branch 212 an nei a; public sector bank branch 81, private sector bank branch 28, regional rural bank branch 85 leh cooperative bank branch 18-te an ni. Bank zawng zawngte deposit belhkhawm chu vbc. 10,532.17 a ni a, advances chu vbc. 4489.48 niin, CD ratio chu 42.63% a ni.