KHAWTHLIR

Aizawl Thunders chuan Remna Ni pualin Inrinni khan Khanpui khuaah a thlawna inentirna, free clinic an buatsaih. Free clinic-ah hian doctor leh nurse-te'n mi eng emaw zatte hriselna an enfiah a, a thlawnin damdawi an sem bakah, naupangte hnenah toothbrush leh chocolate an sem a ni.

Inrinni khan Armed Veng Branch YMA chuan Synod Hospital tan thisen unit 47 an pe a, petute mipa 36 leh hmeichhia 11 an ni a; June 22, 2019-a unit 56 an pek nen an golden jubilee puala an pek zat chu unit 103 a tling. ṬKP Coordination, Aizawl pawhin Zotlang Bialah thisen pek an huaihawt a, mipa 113 leh hmeichhia 32-te'n unit 145 an pe. MṬP Theiri Branch-in Siaha District Hospital tan unit 24 pein, petute mipa 20 leh hmeichhia pali an ni a; Champhai Bethel Venga Chhura Hmun Welfare huaihawtin mipa panga leh hmeichhia pathumte'n Champhai District Hospital tan an pe bawk.

Kolasib Ṭumpui Veng YMA chuan February 28, 2019 khan an hall-ah an din champha vawi 77-na an lawm a, bialtu MLA K Lalrinliana'n a hmanpui. K Lalrinliana chuan, YMA thupui pakhat, 'Hun âwl hman ṭhat' tih chu tunlaia Mizo society-a thil pawimawh tak a nih thu a sawi.

Vawiin July 1 hi Doctors' Day a ni a, Indian Medical Association (IMA) Mizoram State Branch pawhin an hmang dawn. Aizawlah chuan zing karah walkathon neih a ni dawn a, district hrang hrangah blood donation campaign & camp huaihawt a ni ang. Doctors' Day hi khawvel ram hrang hrangah hman a ni ṭhin a, India ramah chuan Dr BC Roy pian champha leh a thih champha July 1-ah hman ṭhin a ni.

Assembly deputy speaker Lalrinawma chuan June 29, Inrinni khan a bial chhung, Tlungvelah MNF huaihawta Remna Ni lawmna a hmanpui. Lalrinawma hian Hmunṭha tlanga Eklaviya School hmun tur leh ZEDA-in kawlphetha megawatt 2 pe chhuak thei tur solar power plant an din mek a hmunah a tlawh nghal.