Hriselna lama hma kan sawn theih nan Mi tinin mawhphurhna kan nei - Dr Thangtea

Health minister Dr R Lalthangliana chuan June 29, Inrinni khan Hrangturzo biala khaw hrang hrang a tlawh a; hriselna lama hmasawnna turin mi tinin mawhphurhna an neih thu a sawi.

Amah lo hmuaktu mipuite hmaah Health Minister chuan, "Hriselna lama hma kan sawn zel theih nan nun kan uluk a, damlo titlém tura kan invawn uluk deuh deuh a ṭul. Hriselna lamah hma kan sawn theih nan mi tinin mawhphurhna kan nei vek a, hospital leh medical centre-te pan ngai loa nun hrisel neih tuma hmalak uar deuh deuh a ṭul tak zet a ni," a ti.

Dr R Lalthangliana chuan, hriselna lamah Mizoramin nasa takin hma a sawn tih sawiin, "May 2019-a Sample Registration System Survey report a tihchhuah tharah Mizorama infant mortality rate (IMR) chu 15-ah a tla thla dâwrh mai a, kum 2010-ah kha chuan 37 lai kan la ni a, hei hi thil lawmawm leh chhin­chhiah tlak a ni," a ti a; tun hnaia NITI Aayog-in India rama state hrang hrangte hmalakna report a siamah Mizoram chu state tête zinga hriselna lama thawk ṭha ber a nih thu a sawi.

Health Minister chuan, hriselna lama dinhmun duhawm taka Mizoram a din chhan chu Health department péng hrang hrangte thawhrimna te, NHM hmalakna ṭhat vang te, department hrang hrangte thawhhona ṭhat vangte leh Mizoram mipuite thawh rah a nih thu a sawi a, "Health department tihchangtlunna hna hi nasa zawkin kan thawk zel dawn a, tun hnai maiah pawh centre hrang hranga damdawi supply tihpuna tihchak thar a ni a, kan CHC, PHC leh sub-centre-te'n an ṭangkaipui hle," a ti.

Minister hi Commerce & Industries joint director HD Lalrintluanga, NHM mission director Dr Eric Zomawia, Health joint director Dr C Lalzepuii leh sorkar official dangte'n an ṭawiawm a ni.