Rua (mau) hmangin sorkarin Mizoram mipuite din chhuahtir a tum - Lalruatkima
Minister of state Lalruatkima chuan, rua (mau) hmangin sorkarin Mizoram mipuite din chhuahtir a tum thu leh, mau/rua chungchanga chief minister Zoramthanga mission chu a hlawhtlin ngei dawn thu a sawi.
June 28, 2019-a Mizo Hnam Runa inkhawmah thu sawiin Lalruatkima chuan, "Rua (mau) hmangin sorkarin mipui dinchhuahtir a tum. Rua hmang hian Mizo mipui kan intodelh thei tih a chiang a, China ram kan thlir pawhin mau hmanga sum an siam nasatzia leh an hman ṭangkaizia kan hria. SEDP hi râltiang ram kan kai theihna tur a ni a, hemi kaltlanga rua (mau) hmanga mipuite dinchhuahtir ngei turin sorkar chuan hma a la dawn a ni," a ti.
Lalruatkima chuan, "Mau hi sum lak luh nan a ṭhat em em piah lamah, khawvel environment chhe zel ven nan a pawimawh em em a, boruak chhia ei raltu pawimawh tak a ni. CM Mission hi a pawimawh a, a hlawhtling ngei ang," a ti a; Earth Summit-ah pawh boruak chhe zel tur ven chu ngaih pawimawh a nih thu a sawi.
Budget session neih zawh tak chu ruling leh opposition member-te an hlim tlang veka a hriat thu sawiin Minister chuam, "Sorkar hnathawk hlawh bakah, hmasawnna hna thawhna tur Chief Minister leh Finance Minister ni bawkin a duang ṭha hle a, mipuite tana phurrit tur chhiah sang lutuk ang chi leh leiman ang chite a awm lo," a ti.