DC-in waste converter a hawng

February 29, Inrinni khan Mara Autonomous District Council (MADC) Biodigester Centre-ah bawlhhlawh ṭawihralthei chi leiṭhaa chantirna, organic waste ( wet waste) converter khawl chu Sia­ha DC Bhupesh Chau­dhary an a hawng.

Bhupesh Chaudhary chuan organic waste converter project chu Mizoramah a vawikhatna a nih thu sawiin, "Kan bawlhhlawh sawngbawl dan hian kan faina chung­changah chauh kawng­ro a su lo a, kan rilru hmasawnna thlengin a nghawng dawn a ni," a ti. 

Thusawitu dang MADC CEM N Zakhai chuan Siaha district hmangaihtu leh hmang­chang hria DC an neih avangin an district chu an vanneih thu a sawi. Biodigester dinna hi Bhupesh Chaudhary-a'n Bharat Petroleum Corporation Limited (BPCL)-te Corporate Social Responsibility (CSR) aṭanga a dilchhuah a ni a, cheng nuai 19 senga din a ni. Organic waste converter hian ṭawihral thei thilte chu ni 10 chhungin leiṭhaah a chantir dawn a ni.