AMC inthlanpuia vote tlate Vawiinah chhiar a ni dawn
Aizawl Municipal Corporation (AMC) inthlanpui vawi thumna, February 16, 2021-a neiha vote tlate chu vawiin hian Pachhunga University College (PUC) campus-ah chhiar a ni dawn a; harsatna a awm loh chuan chhiar zawh thuai beisei a ni.
AMC inthlana vote tlate hi chawhma dar 10-ah chhiar ṭan a ni dawn a, vote chhiar turin inbuatsaihna peih a ni tawh. Inthlanah hian AMC electoral roll-a voter 2,20,110 zinga mi 1,39,743 (63.49%)-in vote an thlak a, kum 2015 AMC inthlanah khan vote 63.55% a tla.
Vote thlâkna electronic voting machine (EVM)-te chu vawiinah strong room (Assembly Annexe) aṭangin vote chhiarna hmun tur PUC-ah lâk thlâk a ni ang. Vote chhiarna atan block paliah counting hall siam a ni a, ward zawng zawng a ruala chhiar tur a ni.
Vote chhiar tur avang hian Traffic SP Rodingliana Chawngthu chuan PUC leh a chhehvela lirthei tlan dan tur leh vote thlaknaa kal lirtheite dahna tur a ruahman a; counting hall leh lirthei dahna tura tih pakhat, PUC field chu a inkar a hlat ve deuh avang leh kawng a chhuk chhoh avangin candidate-te chu lirthei an keng a nih chuan, driver hruai tura thuràwn pek an ni.
Lirthei chêt vel dan tur
1. Returning Officer leh Assistant Returning Officer-te lirthei chu PUC campus chhungah tlân lutin, counting hall kawt hmun âwl zau laiah dah theih a ni.
2. EVM phurtu lirthei te, AMC candidate te, election agent-te lirthei chu PUC field-ah dah tur a ni.
3. Counting supervisor, counting assistant, counting agent-te leh vote chhiar, a hmuna ngaithla duhte tan College Veng biak-in bula khelmualah lirthei dah a, kein PUC campus-ah luh tur a ni ang.
4. Phalna bik card nei media mite chu PUC campus chhungah tlân lutin, lirtheite chu dahna tura ruahmanah dah tur a ni.
5. Ruahmanna hi a hmuna duty traffic police-te'n ṭul leh ṭha an tih angin an tidanglam thei ang.