KHAWTHLIR

Central Silk Board aiawh North Eastern Regional Textile Promotion Scheme (NERTPS) Joint Verification team chuan Thawhlehni leh nimin khan Lunglei district-a khaw hrang hranga sorkar departmental hmalaknate an enfiah. Sorkar thuchhuah chuan, Lunglei district-a Sericulture department leh kut hnathawktute hmalakna chu chhuanawm an tih thu a tarlang.

Mamit bawrhsap Dr Lalrozama chuan nimin khan Bawngva khua a tlawh a, Aspirational district hnuaia tehfung hrang hranga hnufual bik khaw 11-te pualin vantlang inkhawm leh awareness campaign a neihpui. Inkhawmah hian Health department, School Education department, ICDS, DLCW (MSK) leh Mamit MRB aiawhte'n kalkhawmte thil chi hrang hrang an hrilhfiah a ni.

State Referral Hospital-ah nimin khan Covid-19 vei mi pakhat dah luh a ni a, ani nen mi pali enkawl mek an ni. SRH-ZMC Bulletin tarlan danin, mi pali zinga pakhat chu ICU-ah awmin, ventilator nen enkawl mek a ni a, Isolation ward-ah awm mi pathumte'n harsatna lian tham an nei rih lo. SRH-a awm zingah hian kum 60 chung lam leh naupang an awm lo a ni.

PC Lalhmangaihropuii (19) d/o PC Lalnihmawia, Zobawk chu February 16, Thawhlehni tlai khan Mat luiah a tla hlum. Thu dawn danin, PC Lalhmangaihropuii hi Zobawka ṬKP, Ebenezer Unit Hosea group-in Mat luia chengkawl an khawrh hnatlangah a tel a, khaw thim hma deuha chaw an fâk dawnah a awm ve lo tih hriat chhuah a ni. A kalpuite chuan zawng nghalin, luia lungsumah an hmu ta a ni.

HC Thanchungnunga lehkhabu ziah, 'Hmanlai Mizo chhungkua' tih chu nimin khan Hnahthial Electric Veng community hall-ah district bawrhsap Vanlalmawia'n a tlangzarh. Lehkhabuah hian hmanlaia Mizo chhungkaw hrang hrang leh inrêlbàwl dante tarlan a ni.