Court-ah CM Zoramthanga a inlan

MNF sorkar hmasak hun laia Mizoram Intodelhna Project (MIP) kalpui danah thil fel lo a awm nia sawi thubuaiah chief minister Zoramthanga chu nimin khan Special Court (Prevention of Corruption Act) judge Vanlalenmawia hmaah a inlan.

MIP sum chu loan-a pek chhuah tur ni loin, ṭanpuina atan chauh pek chhuah tur a nih laiin, loan-a pek chhuah a awmah ngaiin PRISM chuan kum 2009 khan ACB-ah FIR an thehlut a ni. PRISM tarlan danin, MIP sum chu firm pali hnenah loan-in cheng nuai 226.5 pek chhuah a ni a, sum pek danah thil fel lo a awm a ni.

Sorkara Vigilance department chuan kum 2009 khan ACB hnenah thubuai chhui phalna a pe a, ACB chuan chhui zuiin, January 2013 khan Court-ah thubuai chhuina chargesheet an thehlut.

Special Court (PC Act)-ah hian nimin khan chief minister Zoramthanga bakah, khatih laia Agriculture minister H Rammawi leh CM adviser Lalhuapzauva te chu thubuai siamsak an nih avangin an inlan a, thu zawhfiah an ni.