Silchar MSU-in Hailakandi DC an hmu

Mizo Students' Union (MSU), Joint Headquarters, Silchar office bearer-te chu nimin khan Hailakandi-ah kalin, Hailakandi bawrhsap Megh Nidhi Dahal an hmu a; Bairabi Zophai lama Mizoram-Assam ramri chungchang leh February 9, 2021 zana Gharmura Mission Compound-a Mizo awmte beih an nih chungchang an sawipui.

Silchar MSU hruaitute chuan Hailakandi DC hnenah hian, Assam Chief Minister hnena thleng tur lehkha an thehlut a; lehkhaah chuan, Gharmura Mission Compound-a cheng Mizote harsatna tawh chu pawi an tih thu te, misual kut tuarte chhungkua chu Assam sorkarin zángnadawmna a pek an phût thu te, pawi khawihtute chu mana hrem an phût thute an tarlang.

Gharmura-a Presby­terian Mission School chu Gharmura leh a chhehvel mipui tana a ṭangkaizia leh khawtual pawhin an thlàwp an beisei laia an chunga thil thleng chu lungchhiatthlak an tih thu te, buaina thlen chhan nia lang Zophai bula ramri buai chu chingfel thuai tura Mizoram sorkar leh Assam sorkar an phût thute an ziak bawk.

Hailakandi DC chuan, Gharmura-a Mizote tawrhna chu pawi a tih thu leh khawiah pawh mi fel tak tak an awm laiin, misual pawh an awm ṭhin thu a sawi a, Gharmura khawtlang mipui náwlpuiin Mission School an thlàwp thu sawiin, "He thil thleng hi ramri buai vang a ni a, ramri buai hi state pahnih kan inrem a, kan chinfel theih chuan buaina zawng zawng a reh thuai ka beisei," a ti.

Silchar MSU hruaitute zawhna chhángin Haila­kandi DC chuan, Gharmura-a thawk Mizo missionary-te chu an hna zawm thuai tura a duh thu leh an let leh hunah pawh sorkarin venhimna ṭha tak a pek tur thu a sawi a; MSU-in lehkha an thehluh chu a rang thei ang berin Assam CM a thawn tur thu a sawi bawk.