Mizoram Right to Public Service Act Mipuite'n hma Mizoram Right to
Administrative Training Institute (ATI) director Lalzarmawii chuan, nimin khan IPR Auditorium-ah thuthar thehdarhtute a kâwm a; sorkarin mipui hnena service hrang hrang a pek chhuahte hunbi tiam chhunga a pek chhuah ṭhinna tur dan, 'The Mizoram Right to Public Service Act, 2015' chu mipuiin hmang ṭangkai se sorkarin a duh thu a sawi.
Lalzarmawii chuan, The Mizoram Right to Public Service Act chu Assembly House-ah March 24, 2015 khan pass a nih thu sawiin, "He dan hian Mizoram pum a huam a, autonomous district council (ADC)-ah erawh adopt a nih loh chuan a huam lo. Sorkar hnathawk - casual leh daily rate-a thawk, contract-a thawk, sorkar mi pawimawh bik leh 6th. Schedule hnuaia inrêlbâwlna bik neite a huam lo a ni," a ti.
ATI Director chuan, dan hnuaiah hian state sorkar thuneihna pek a nih angin, mipui mamawh service hrang hrangte a ṭul dan ang zela seng luh theih a nih thu sawiin, "He dan hnuaia service dah tawh chu a diltu hnena pek chhuah hun tur 'hunbi' siam zel a ni," a ti a; dan hnuaia service dahte chu a pe chhuaktu tur designated officer (DO) ruat zel an nih thu a sawi.
Mizoram sorkar hnuaiah he dan hian department paruk - Transport, Social Welfare, PHE, Rural Development, Taxation leh Finance-te a huam mek tih sawiin Lalzarmawii chuan, "Department hrang hrangte hian he dan hnuaiah hian service 46 an pe chhuak thei. Heng service-te hi DO hnena ziaka dilna thehluh aṭanga hun tiam chhung ngeia pek chhuah tur a ni. Service dang tih belh zel kan tum," a ti.
ATI Director sawi danin, he dan hnuaia service dilna thehluhnaah, document thehluh ngai apiang thehluh tur a ni. Dilna thehluh chu DO-in a dawng ngei tih hriatna acknowledgement receipt lak tur a ni.
DO-te chuan service diltu hnenah hun tiam chhungin an pe ngei tur a ni a, an duh chuan sorkar hnathawk dangte ṭanpuina an dil thei ang. DO chuan service dilna a dawn chu hun tiam chhungin a pe tur a ni a; chutih rualin, dilna chu chhan mumal tak nen a hnaâl thei bawk.
Dilna hnâwl a nih vanga a diltu an lungawi loh chuan, lungawi lohna an thlenna turin first appellate authority leh second appellate authority an awm a; DO-te'n chhan leh vang mumal awm loa service dilna an pe chhuak duh lo a nih chuan Rs. 500 aṭanga Rs. 5,000 chawitir theih an ni.
Vanglaini palai zawhna chhangin DPAR under secretary Lalrohlua chuan, service hrang hrangte chu DPAR leh a kaihhnawih department inráwn tlang chunga an thlan a nih thu a sawia, "Hun tiam pawh department lamin an duh ang rawtna an siamte hman a ni. Department dangte chu dan hnuaia service pektir ve kan hotute rilruah a awm," a ti.