Health Minister-in Central-a hotute a kâwm
Health minister Dr R Lalthangliana chuan, Ningani leh Zirtawpni khan a department chan - Health, Higher & Technical leh Commerce & Industries-a sorkar laipuia thuneitute New Delhi-ah a kâwm a, Mizoram tana thil pawimawh hrang hrang a sawipui.
Dr R Lalthangliana hian Union Human Resources Development minister Prakash Javadekar nen an inkawmnaah Mizorama college zirtirtute'n UGC Pay norms anga hlawh an hmuh turte an hmuh thuai theih dan tur te, college hrang hranga infrastructure tihphuisui dan tur te, SSA leh RMSA-te harsatna tawh te, RUSA hmalakna te, Hindi teacher 1,187 bân tawhte lak leh chungchangte leh SCERT leh DIET-te harsatna chung changte a sawipui a ni.
Ministry of Food Processing Industries secretary Pushpa Subrahmanyam nen an inkawmnaah R Lalthangliana chuan, Mizorama industry tihchangtlun dan tur leh juice manufacturing unit din dan tur a sawipui.
Dr R Lalthangliana chuan Union Health secretary Preeti Sudan pawh a kâwm a; MIMER tihchangtlunna atana Mizoram sum a hmuh belh theih dan tur te, Cancer Hospital tihchangtlunna tur TCCC project atana sorkar laipuiin sum a la pek loh a pek vat theih dan tur leh, National Health Mission lama hmasawn zel dan tur an sawi dun a ni.
DoNER secretary Naveen Verma pawh Dr R Lalthangliana hian a kawm a; Mizoramin Cancer Superspeciality Hospital & Research Centre a mamawhna leh neih theih dan tur te, district hospital hrang hrang tihchangtlun dan turte a sawipui bawk.