UPC (NEI) 2019 budget Rs. 37,10,59,448

UPC (North East India) chuan January 30-31, 2019 chhung khan an kohhran rorelna sang, Executive Board budget session chu Gene­ral headquarters Office Committee Room, Mual­pui, Aizawlah an nei a; kum 2019 budget atan Rs. 37,10,59,448 an pawm.

UPC Executive Board budget session hi general superintendent Rev. Lalmalsawma Sailo-in a kaihruai a; Mizoram chhung bakah, Nagaland, Meghalaya, Manipur, Assam leh Tripura aṭang­in Execu­tive Board mem­ber-te an kal kim.

Meeting chuan, kum 2019 atana sum ruahman (budget) an thlir a; sawm pakhatah Rs. 26,59,37,288, mission rawngbawlna atan Rs. 5,36,87,520, Ladies Auxiliary Department (LAD) atan Rs. 91,24,155, Pentecostal Youth Department (PYD) atan Rs. 53,64,955, Sunday School atan Rs. 67,88,000 an pawm. Heng bakah hian Committee pêng hrang hrang budget an pawm a, kum 2019 atana budget pumpui an pawm chu Rs. 37,10,59,448 a ni.

Budget bakah hian, India hmarchhak pum huapa Pastoral Meet neih te, Tripura district-a Darchawi biak-in sak ṭanpui nan Rs. 3,00,000 leh Chandel district-a Novakom biak-in sak ṭan­pui nan Rs. 2,00,000 pek an rel bawk.