Politician vangin sorkar thupek a hlawhchham

Aizawl District Magistrate (DC) thupek bawhzuiin police-te chuan nimin khan Raj Bhavan hmar lam gate bul traffic point leh Tennis Court traffic point inkar kawngpui sîr, kea kalnaa serthlum zuarte chu ṭhu tawh lo turin an hriattir a; nimahsela politician aa inrawlh avangin an insawn chhuahtir thei lo.

Hetih lai hian, MNF party-a hotu lu pakhatin cabinet minister leh Aizawl Municipal Corporation hotute biain, serthlum zuar­te chu footpath-a in­zawrhtir tura a hrilh angin serthlum zuarte chu police-in an hnawtdarh thei ta lo nia thu dawn a ni.

Aizawl khawpui chhunga kawngpui sir, kea kalna (footpath)-ahte thil zawrh khap a nih thu January 28, 2018 khan Aizawl Bawrhsap chuan thupek chhuahina puang a; thupek a chhuah chhan chu - kawngpui kama kea kalnaa inzawrhin mipui kal vel a tihharsat bakah, intawhsual a hlauhawm vang a ni.

Aizawl Bawrhsap chuan, motor kawng dung leh kea kalnaahte thil zawrh ṭhin a nih thu sawiin, "Dawrkai ṭhenkhat pawhin an dawr bungrua an chhawp ṭhin tih hriat a ni a, hei hian mipui kal vel a tih harsat bakah lirthei tlan te nen intawhsual palh a hlauhawm hle. Chuvangin, heng hmunte a him zawkna turin khapna thupek chhuah a ni," a ti.

District Magistrate khapna thupek hian January 24 aṭanga ni 60 chhung a huam phawt dawn a, thupek zâwm lote chu dan anga hrem an ni ang. 

.    Sikulpuikawn leh Mission Veng biak-in inkar kawngpui kam leh kea kalnaah.

.    Land Revenue & Settlement Directorate leh Excise & Nar­cotics Commissionerate inkar kea kalnaah.

.    Tennis Court chhehvel kawngpui kam leh kea kalnaah.

.    Tennis Court leh Agriculture Directorate inkar kawng kam tawn tawnah.