MKHC-in lawmthu an sawi
Mizoram Kohhran Hruaitute Committee (MKHC) chuan thuchhuah siamin, Pathian venna leh hruainaa Mizoram MLA General Election tluang leh fel taka neih a ni chu lawmawm an tih thu leh, kumin Republic Day boycott chungchangah, buaina pumpelh zawnga hmalak a ni chu lawmawm an tih thu an tarlang.
MKHC chuan, Mizoram mipui vote thlaktute chungah leh boruak muanawm tak hnuaia inthlanna thianghlim leh fel a awm theihna tura ṭhahnemngai taka ṭawngṭai ṭhin kohhran mipui chungah an lawm thu an sawi a, "Kan ram himna tur leh inthlanna fel leh thianghlim kan neih theih nana inthlan dawna NGO Coordination Committee-te'n zâwldawh taka hma an laknaah te, Mizoram mipui hmakhaw ngaia fimkhur taka hma latu sorkara mawhphurtu hrang hrang te, ECI leh inthlan buaipuitu zawng zawng chungahte lawmthu kan sawi a ni," an ti.
MKHC chuan, Mizoram hruaitu atana mipuiin an thlan chhuahte'n dik leh fel takin rorel an duh thu an sawi a; chutih rualin, ram hruaitute hmalakna ṭhate thláwp zel tur leh an tana ṭawngṭai ṭhin turin mipui an ngen.
Kumina Republic Day boycott a nih chungchangah MKHC chuan, "NGO Coordination Committee-te'n Citizenship (Amendment) Bill, 2016 duh lohna lantir nana Republic Day lawmna an boycott-naah, ram leh hnam hma khaw ngai tak leh buaina pumpelh zawnga hma an lak avangin lawmawm kan ti tak zet a ni," an ti.