MLA fund tihpun tum mek nia a hriat thu ZPM leader Lalduhoma'n a sawi

ZPM Legislature Party leader Lalduhoma chuan nimin khan a bial chhung, Thenzawl khua fangin, khawtlang mamawhte a enfiah a, Ningani zan khan khawtlang hruaitute a kâwm bawk. Lalduhoma chuan, MLA fund chu mipui ta a nih thu leh, state dang aiin Mizoramah a tlem avangin sorkarin tihpun a tum meka a hriat thu a sawi.

Ningani zana Vantawng Group YMA Rûna Thenzawl V/C member-te leh khawtlang hruaitu dangte nena an inkawmnaah V/C-te leh tlawmngai pawl hrang hrangte chuan an khaw chhunga hmalakna tura pawimawh nia an hriatte an lo thlen. MLA chuan, khawtlang mamawh hrang hrang tih theih dan kawng pathum - MLA fund, state sorkar leh central-a funding zawnte a nih thu a sawi.

MLA fund leh sum awm thei dangte hmangin theihtawp chhuaha a bial hmasawn nan hna thawh a tum thu sawiin Duhoma chuan, department leh sorkar hotute hnenah pawh thil eng emaw zat sawi chhuak thei ve turah a inngaih thu a sawi a; chutih rualin, opposition MLA a nih avangin, a thil tih theih erawh a sang lo tih hriatpui a, khawtlang hmasawn nan theihtawp chhuahpui turin khawtlang hruaitute a ngen.

Lalduhoma chuan, MLA fund chu mipui ta a ni tih sawiin, "Kan zavaia ta a ni a, inchuh lo a, khawtlang hmasawnna tura a pawimawh dan thlir chunga inken thiamte pawh a ṭul dawn a ni," a ti a; MLA fund chu state dang aiin Mizoramah a tlem a, sorkar pawhin ṭangkai zawka hman tura tihpun a tum mek nia a hriat thu a sawi.

Khawtlang hmasawnna tur kawng hrang hrangah MLA-te'n MLA an nihna anga theihtawp chhuaha an hmalaknaah, ruling party-te'n an bawhzui thiam danin kawngro a su thui hle tih sawiin Duhoma chuan, khawtlang hmasawn nan ruling party leh opposition party-te an thawhho thiam a pawimawh thu a sawi a; "Mizoram politics chu inhuatnaa bul ṭan, lal bân aṭanga inṭan a ni a, inhuatna politics thui tak kan kalpui tawh hi bànsan a hun tawh a ni," a ti.

MLA Lalduhoma hian nimin khan Thenzawl khaw chhunga hna thawh mek - Golf Course, Horticulture College leh Thenzawl Auditorium sak mekte a hmunah kalin a enfiah a; hna thawktute chu an ṭha taka thawk turin a chah.

Thenzawl Venghluna audito­rium sak mek chu a ṭha tâwk loa a hriat thu khawtlang hruaitute nen an inkawmnaah a sawi a; a kalphung tur ang tak ni loa sak nia a hriat thu leh a tlo a rin loh thu sawiin, thuneitute-ah bawhzui a tum a thu a sawi a ni.

Lalduhoma hian nimin zing khan Thenzawl Zone Football Association hruaitute nen Loṭha­zawl khelmual, tui tling thei loa siam dan tur leh chei ṭhat dan turte a hmunah kalin an enho bawk.