Chalhfilhah kraws sang ber phun kan tum - Lalrinliana Sailo
Mizoram Legislative Assembly speaker Lalrinliana Sailo chuan nimin khan Mizo Hnam Runa MNF chhung inkhawmah thu sawiin, a bial chhunga Chalhfilh tlangah kraws sang ber phun an tum thu a sawi.
Lalrinliana Sailo chuan, "Pathian leh kan ram tan titute tana inhmeh em em chu, Chalfilh tlangah tuifinriat level aṭanga teha kraws sang ber phun kan tum a, bial mipuite nen a hmun pawh tlawh tawhin, ṭawngṭaina pawh kan hmangho tawh. Kraws sang ber din satliah ringawt kan tum lo a, bethelna hmun leh Pathian rawngbawlna hmun pawimawh takah a chan theih ka ring," a ti.
Citizenship (Amendment) Bill chu Mizo mipuiin an duh loh thu an lantir nasa tawh tih sawiin Lalrinliana chuan, "Heti chunga an tih luih chuan India kan ni reng thei tawh lo mai thei a, kan kraws dinna tur hi Mizoram laili tak pawh a la ni thei," a ti a; MNF chu Mizo hnama chiang leh nationalism-a innghat a nih thu a sawi.
Lalrinliana Sailo chuan, Chalfilh bial chu MNF la tlin ngai lohna bial a ni tih sawiin, 'Pathian leh kan ram tan' tia thawk fan fan a, NLUP hnâwla SEDP nghak chhuaktute chu an hlut thu leh MNF tana puan var sintute an nih thu a sawi a; "Ka hun chhung ngeiin kan bial chhunga sikul zawng zawngah power point presentation neih nan projector dah vek ka tum a, 'Hmar thimpui zángkhaw bungbut hnan' tih thin chu tihên kan tum a ni," a ti.
Heatlh minister hlui Lalrinliana chuan, Health department a enkawl laiin US dollar nuai 1,000, MNF sorkar hmasa tihchhuah hman hman loh aṭangin cheng vbc. 118 vel Health deparment-in an chang tih sawiin, "Kha'ng pawisa awmna kha a hun lai khan MNF-in min zawt ta u la, in hre chiang mai tur," a ti. Mizoram Building & Others Construction Worker's Welfare cess atan contractor-te aṭanga 1% lak tling khawmte chu raipuar leh hnathawktute'n an chhawr ṭangkai thu sawiin, cheng vbc. 60 vel la hman loha awm chu hotute'n an tihchhuah thuai a beisei thu a sawi.
Assembly Speaker chuan, blood processing fee lak chu Congress sorkar tlak chhante zinga pakhat a nih a rin thu te, Congress sorkar chu border trade chungchangah a muthlu tluan chhuak zaka a hriat thute a sawi bawk.