Fire Prevention Week hman dan tur rêl

Lunglei District Fire Prevention Committee chu nimin khan Lunglei DC Conference Hall-ah SDO(S) Lalnundika kaihhruaiin an ṭhukhawm a; Fire Prevention Week 2019 chu Lunglei district-ah February 11-16, 2019 chhunga hman an rel.

Meeting chuan, Lunglei district Fire Prevention Week hawnna inkhawm chu February 11-ah Convention Centre conference hall-ah neih an rel a; Week chhungin in tinah kalin, kângmei laka inven dan zirtirna pek an rel. Lunglawn, Chanmari, Kikawn, Serkawn, Zotlang leh Pukpuia PHE tuizemahte tui engtik lai pawha Fire & Emergency Service-in a ṭul huna tui an hman theiha dah khat turin PHE department ngen ni se, an ti.

Kângmei laka inven chungchang ziak ṭha chanchinbu pathum thlan te, kângmei ven kawnga thawk ṭha khua pathum thlana lawmman pek te, March 15, 2019 ral hmaa lo hâl vek tur thu chhuah te, Lunglei khawpui chhung lailiah banner târ te, V/C, YMA, MUP leh MHIP-te nena ṭanghoin awareness campaign, pamphlet sem, in tina kala kângmei laka inven dan zirtirte an rél bawk.

Meeting-ah hian Lunglei DFO Dr C Vidhyasagar, District Fire Prevention Committee member secretary ni bawk chuan kum 2018 chhunga kângmei ven kawnga hmalaknate a tarlang a; Lunglei Forest Division hnuaiah khaw chhungah kângmei vawi thum leh khaw páwnah vawi 283 a chhuak a, ram hectare 637.23-a zau a kang chhiah tih a tarlang.