District level-a Planning buatsaih zirho

Nimin khan Champhai, Lawngtlai leh Mamitahte 'Sensitization workshop on District Level Planning' buatsaih a ni.

Champhaiah chuan Champhai College-ah workshop neih niin, Lengteng bialtu MLA L Thangmawia'n a hawng a; MLA chuan, Mizoram hmun hrang hranga chengte mamawh a inang lo tih sawiin, "Kan duh zawng pawh a inang lo hle. Chutih rualin, kan mamawh em em vek chu zirna leh hriselna hi a ni a, zirna-in chhiaah chuan luh a châkawm loh ṭhin a, a bikin sorkar zirna-in hi a chhe zual em em a ni. Hriselna chungchangah pawh ṭan nasa lehzuala lak a ngai," a ti.

Champhai DC Dr Naveen Aggarwal pawhin thu sawiin, "Hmun tinah hian zirna-in aiin biak-inte hi a mawiin a ṭha zawk a, zirna-in erawh chuan hlamchhiah a hlawh ni," a ti a; MLA-te chu zirnaah hma an sawn zel theihna tura zirna in atan an fund aṭanga 25% tal pe turin a ngen.

Lawngtlaiah chuan workshop hi Chandmary YLA Hall-ah buatsaih a ni a, LADC chief executive member T Zakunga khuallian a ni. T Sakunga chuan, India ramin hma a sawn rualin, Mizoram pawhin hmasawnna kawng a zawh zel theih nan theihtawpa hmalak a nih thu sawiin, "Huapzo hmasawnna nei tur chuan plan fel tak neia kal a pawimawh," a ti.

Mamitah chuan Chhimveng YMA Hall-ah workshop buatsaih a ni a, districr bawrhsap Vanlalngaihsaka'n a kaihruai. Planning deputy secretary H Lianzela'n hmasawnna huapzo tak leh ngêlnghet taka a kal theihna atana ruahmanna siam leh tihhlawhtlin chu sorkar hna leh ram rorelna atana pawimawh ber a ni tih chu a sawi.