KHAWTHLIR

Power & Electricity department chuan, February 4-6, 2019 chhungin Luangmual Sub-Station-ah hna thawh a nih dawn avangin, hna thawh ni turahte hian zing dar 7 aṭanga chawhma dar 10 thleng power supply tihtawp a ni ṭhin dawn tih an tarlang. Power supply tihtawp hian Aizawl tlak lam veng zawng zawng bakah, Chaltlang, bawngkawn leh Khatla veng ṭhenkhatte a huam dawn a; Power & Electricity department chuan mipui hriatthiamna an ngen a ni.

Bunghmun Volley Ball Club-te chuan nimin khan Lunglei Civil Hospital-ah thisen unit 11 an pe. Mizoram Taxi Drivers Association sub-headquarters, Kolasib pawhin Ningani khan Kolasib District Hospital-ah thisen unit 18 an pe bawk.

Zo Re-unfication Organisation (ZoRO) chuan January 29-31, 2019 chhung khan Vairengte-ah Zo Inpui inkhawm an nei a, kum 2019 chhunga an budget atan Rs. 1,54,90,000 an pawm. Inkhawmpui chuan, Zofa zawng zawng huapzo tur Zo Kûtpui neih an rel a ni.

Association for Environmental Preservation (ASEP) chuan, tunlai hian environment humhalhna kawngah inzirtirna thingtlang hmun ṭhenkhatah campaign rusum an thlak mek. Nimin pawh khan Thanglailung, Sumsuih leh Chamring khuaahte campaign an buatsaih.

Police officer, mahni hna atana dan phal baka police chhawr ṭhin an tam thu Vanglaini chuan report a dawn belh zel.

Nimin khan Chapchar Kut Programme Sub-Committee chu an chairman Hmingthanzuala, Art & Culture director hoin a pisaah an ṭhukhawm a, kût hman tura inbuatsaihna hrang hrangte an thlirho.

Mizoram RMSA Employee Welfare Association chuan Chief Minister's Relief Fund-ah Rs. 10,000 an chhûng lut. CM Relief Fund hi mi harsate ṭanpui nan hman ṭhin a ni.