MJA member-te'n press tour nei mek

Mizoram sorkar chuan tunlai hian Mizoram chanchinbu mite tan press tour ṭhuang thumin a buatsaih mek a; a thawh lina pawh an kal leh thuai dawn. Press tour-a kalte hian an kalna state sorkar hotute kâwm a, an sorkar hmalak dante an zir a ni.

Press tour-a Sikkim tlawhtute MJA member 10 leh IPR department official-te chuan February 1, Zirtawpni khan Sikkim chief secretary AK Strivastava leh IPR secretary Sherap Shenga te an kâwm.

Sikkim Chief Secretary chuan, Mizoram chu a hmelhriat tawh ṭhin thu leh sorkar laipui hna ṭulte endikin a kal tawh ṭhin thu sawiin, "Rambuaiin hun rei tak a tihbuai hnuah state rálmuang tak in ni thei hi a ropui hle. India ram state dangte'n an dil nawn fo pawh a an hmuh ve theih loh 'peace bonus' dawng thei hiala in awm hi in lawmpuiawm rualin, in thîkawm lek lek a ni," a ti a; Mizoramah inthlan­na muan­awm taka neih a ni ṭhin chu ropui a tih thu leh zir chian tlaka a hriat thu a sawi.

IPR secretary Sherap Shenga chuan, Sikkim IPR department hmalakna leh hnathawh dan tlangpui MJA member-te a hrilh a; Mizoram IPRO Andrew H Lalremruata'n Mizoram sorkar hmalakna hrang hrangte a sawi ve bawk.

Chanchinbumi 10 leh IPR officer pahnih dangte pawh Kolkata-ah press tour-in an kal a, January 30-ah kalin, nimin khan an lo haw. Kolkata-a kalte hian Kolkata khawpuia bawlh­hlawh sâwngbawl dan an zir bakah, Kolkata Municipal Corporation hotu te, Kolkata Press Club hruaitute leh Calcutta Mizo Welfare Association (CMWA) hruaitute nen inkâwm a ni.

January 31-a KMC pisa an tlawhnaah KMC secretary H Mondal hoin officer-te'n an lo dawngsawng a, Kolkata khawpui an enkawl dan te, bawlhhlawh an sawngbawl dante an zawt. KMC Secretary chuan, Kolkata khawpuia bawlhhlawh chu chi hnih, tui luankawra kal raltir leh a hâlna hmuna kawlphetha siam nana an hâl thu a sawi.

Press mite hian Kolkata Press Club tlawhin, an president Snehasis Sur-a hoin hruaitute'n an lo dawngsawng a, club tualzawl­ah an inkâwm. Zan lamah Salk Lake-a Mizoram House-ah CMWA hruaitute nen zanriah kilho pahin an inkawm a, CMWA hruaitute chu an president Laima Chozah, IAS, West Bangal sorkara principal secretary hoin an tel.

CMWA hruaitute chuan, Central YMA leh MJA-te’n ṭanpuina an pek ṭhin avanga an lawm thu te, Kolkata khawpuiah Mizo 1,000 - 1,200 vel an awm mek thute an sawi. Laima Chozah chuan, indentity card mumal lo vanga airport-a buai an awm zauh zauh thu sawiin, "Mizote hi kan ngaih a sam a, holam deuhin kan zin chhuak a, ID mumal nen zin ṭhin ang u. Harsatna tâwk kan ṭanpui peih, mahse, holam lutuk vanga harsatna tâwk ṭanpui an ngaih leh ṭhin hi a buaithlak," a ti.

Nagaland Team-te chuan ZFebruary 1 khan Nagaland Information Directorate an tlawh a, information officer  ho leh Kohima Press Club member te nen an inkawm.

Inkawmhona-ah hian Nagaland IPR director Limawati chuan an department hmalakna hrang hrangte a tarlang. Mizoram aṭanga IPRO kal Laldingliani leh C Lalhruaitluanga­te pawhin Mizoram dinhmunte an sawi a ni.

MJA secretary Zohmingmawia chuan MJA din tirh aṭanga tun thlenga an kal chhoh dan te, sorkarin MJA member-te tana hamṭhatna hrang hrang a siamte leh MJA member dinhmunte a sawi.