Dr Thangtea'n sorkar laipui hotute a kâwm
Minister Dr R Lalthangliana chuan February 1, 2019 khan New Delhi-ah sorkar laipuia thuneitu hrang hrangte a kâwm a, Mizoram hmasawnna tura thil pawimawh hrang hrang a sawipui.
Dr R Lalthangliana chuan, Ministry of Tribal Affairs secretary Anoop Srivastva nen an inkawmnaah, Mizoram district pariat zingah Mamit chu district hnufual chawikan ngai bik - Aspirational District-ah thlan a nih angin, district dinhmun hre chiang tura zinah a sáwm a; Mamit district hmasawnna atana mamawh thlen tawh cheng vbc. 38 chu a rang thei ang bera pe turin an ngen.
Commerce & Industries Minister chuan, Ministry of Commerce & Industries secretary Anup Wadhwa a kawmnaah Zokhawthar Border Trade leh Kawrpuichhuah Border Trade tihchangtlun dan tur a sawipui.
Ministry of Textiles secretary Raghvendra Singh pawh kâwmin Dr R Lalthangliana chuan Mizorama handloom leh handicraft hmalakna lian tham awm thei ang leh ruahmannate a sawipui a ni.
Health Minister hian Ministry of Ayush secretary Vaidya Rajesh Kotecha hnenah Mizorama Ayush doctor indaih lohna leh thawktu dang indaih lohna a thlen a, Ayush doctor-te ṭangkaina a sawipui.
Higher & Technical Education Minister hian University Grant Commission chairman Prof. VP Singh pawh a kâwm a; Mizoram University hmasawnna tur leh Mizorama constituent university awmchhun Pachhunga University College-a research project atana mamawhte leh post graduate hawn ṭan a nih avangin mamawh hrang hrangte a thlen. Prof. VP Singh chuan Dr R Lalthangliana thu thlente chu a rang lama ngaihtuah a tum thu a sawi a ni.