KHAWTHLIR

Inrinni khan Bawngkawn Chhimveng Kohhranin an kohhran silver jubilee pualin Aizawl Civil Hospital tan thisen unit 60 an pe a, a petute mipa 46 leh hmeichhia 14 an ni. Tuikual South Branch KṬP-in an branch din champha pualin Synod Hospital tan thisen unit 21 pein, a petute mipa 18 leh hmeichhia pathum an ni a; Mizoram Chakma Students Union-in Lunglei Civil Hospital-ah unit 21 an pe. Serchhip corps SAY member mipa 12 leh hmeichhia palite'n Serchhip District Hospital tan unit 16 an pe bawk.

Synod Mission Board-in India ram chhung hmun hrang hranga missionary hna thawk tur a lak tharte tirhchhuahna inkhawm, nimin khan Dawrpui Kohhran biak-inah neih a ni. Tun ṭumah hian missionary atana lak thar mi 86, hmeichhia 54 leh mipa 32-te tirhchhuah an ni a; inkhawm hi SMB secretary Rev. C Zorammawia'n kaihruaiin, Synod moderator Rev. R Lalhmingthanga'n tirhchhuahna hun a hmang a ni.