Sipaiin mau tawlhtute kut an thlak?

February 3, Pathianni zan dar 11:30 vel khan Tlabung thlang, Silkur bula BSF sipai duty-ten mau pûm eng emaw zat tawlhtute chu BSF checkpost bulah tidingin an lo man a; chumi hnuah sipaite chuan mau tawlhtute chu kut an thlak zui nia thu dawn a ni.

Tlabung aṭanga thu dawn danin, Khaw­thlangtuipui hnar lam aṭanga tawlh maute chu a vaiin pum sing chuang a ni a, mau neitu nia hriat Lokhijoy, Silkur khua chuan hlawhfa atan mi pakua ruaiin, a mi rawihte chuan maute chu lui mawng lamah an tawlh a ni.

Maute chu Silkur-a BSF checkpost thlen hma deuhah sipaite'n an lo tiding a, mau tawlhtute chu an din veleh sipaite chuan kut an thlak ta niin, kut tuartute chuan an sawi. Kut tuartute hian nimin khan Tlabung Police Station-ah FIR thubuai an thehlut.

Sipai kut tuar nia insawite chuan, an vaiin mi pakua an nih thu leh, sipaite'n kut an thlak hma pawhin mau neitu an nih loh thu an hrilh a, ngaihdam an dil niin an sawi. Mahse, sipaite chuan kut an thlak ta tho a, an zinga pakhat chu a ke-ah sipaite'n chema an sah avangin hliam na angreng tak a tuar a, mi dang pariatte pawh an taksaah hliam tênau an tuar nual niin an sawi bawk.