Kum 6 chhungin sipaiah Mizo 920 lak an ni
Sainik Welfare & Resettlement department chhinchhuah danin, kum 2012-13 aṭanga kum 2017-18 chhung khan Aizawla sipai lâkna bikah Mizo ṭhalai 920 chu sipai atan lak an ni a, chutih rualin, phai lamah thlan ṭhat leh an ni thung.
Sainik Welfare & Resettlement department office, Khatlaa thawkte chuan, sipai a ṭan chu hlâwkna a tam hle tih sawiin, "A ṭhatna bâk sawi tur a awm lo," an ti a; kum liam ta khan hamṭhatna tam tak zinga pakhat, pension hnua an thite ṭanpuina cheng nuai nga chu mi pasarih an dil chhuahsak tih an sawi.
Mizo ṭhalai tan sipai ṭan a ṭhatzia leh India rama sipai dinhmun sawiin Sainik hotute chuan, India rama sipaite chu XYZ group-ah ṭhen an ni a, lehkha zir sang lo, pawl 10 pass chin tan pawha sipaia ṭan dan leh hamṭhatna a tam avangin a ṭhat thu an sawi a; sipaia ṭang turin kum 17 leh a chanve leh kum 21 inkar nih a ngaih thu te, sipai pangngai chu kum 15 an ṭan hnuah pension a an chhuah theih thu te, an pension hnuah sorkar hnaa chhawr nawn theih an nih thute an sawio a ni.
Pension chungchangah Sainik hotute chuan, kum 2016-ah India rama sipaite'n 'One rank, one pension' an phût chu a hlawhtlin thu sawiin, "Sorkar hnuaia thawkte ang loin, an pension hnu kum thum danah an hlawh ennawn a ni a, an chawlh hnuah pawh hamṭhatna tam tak a la awm a ni," an ti.
Sipaia an ṭan laiin eng vang pawha an lo thi a nih chuan, Army Group Insurance Fund aṭangin cheng nuai 30 pek an ni a; chu bakah chuan sipaite chu an pension hnuah an thih pawhin, Extended Army Insurance Scheme (EAIS) aṭangin cheng nuai nga an la leh thei a ni. CSD department aṭangin Funeral Grant Rs. 10,000 leh Record Office aṭanga pek Demise Grant Rs. 7,000 pawh a hranpaa pek an ni a; khawi hmunah pawh thi se, an ruang chu a thlawnin an chenna inah thlenpui ngei ngei tur a ni bawk.
Sipaite sipai aṭanga an chawlh hnuah sorkar hna group C leh D-a an luh theih nan an puala hna hausak bik turin Ministry of Defence chuan state sorkarte a hriattir ṭhin a; sipai bángte tana state sorkar hnaa reservation siam dan chu - group D-ah 20% leh group C-ah 10% a ni.