Sem policy - ram ṭhanmawh báwk - ZPM Sr. Vice Chairman

ZPM senior vice chairman F Rodingliana chuan nimin khan an pawl pisaa inkhawmah thu a sawi a; ram hmakhua ngaiin mahni kea din a ṭulzia ZPM-in an zirtir laiin, Mizoram chief minister Zoramthanga chuan sem policy a la tuipui viau tih sawiin, "Sem policy - SEDP hi ram ṭhanmawh báwk lian tak a ni," a ti.

MNF sorkarin zu zawrh an duh lo em em nia an insawi laiin, High Court thutlukna chungchangah CM berin 'Court thutlukna a ni a kan thu neihna páwn lam a ni,' tia a sawi chu chhangin F Rodingliana chuan, "Ama'n tih dan a hre lo a nih pawhin, dan hre mi man to taka adviser a rawih hian appeal mai se, dan an siam hmate chu a pawh din theih reng tho si. Court hi hlau tak tak ni se, motor glass dum chhungah hian an chuang ngam dawn em ni?," a ti a; motor darthlalanga thil dum lam bel chu Supreme Court thupek kalh a nih thu a sawi.

F Rodingliana chuan, "MNF-te chu inde­pen­dence sual ngam inti si kha, NGO Coordination Commi­ttee-in Citizenship Amendment Bill, 2016 chungchang kan duh lohzia lantir nana Repub­lic Day boycott tura an ngen khan engati nge an ngam loh?" a ti bawk.