Guwahati-ah house dang mamawh

Guwahati-a Mizoram House-a thawktute chuan, Mizoram House-a thleng thei tur chin ruahman leh damlo pantute an pun zel avangin, Guwahati-ah house dang mamawhna a san thu an sawi.

Tun hnaia press tour-a kalte'n Guwahati Mizoram House an tlawh ṭumin, thawktute chuan Guwahati khawpui chu transit centre ang deuh a nih thu an lo hrilh a, "Damdawi-in pan damlote, hmarchhak hmun danga lehkha zir leh sumdawngte, réla hmun hla zawk pan turte in tawhkhawmna hmun a ni. Sorkarin hmun dangah house dang zawn belh thei se a duhawm hle," an ti.

Guwahati Mizoram House-a thawkte sawi danin, mipui náwlpui thlen theihna building pahnih chu tun hnaiah tuai­hnûm niin, tun hmaa an hming hliauna ṭhin - khumfâ awm ṭhinte pawh mattress thlak vek a ni a, a bang rawng hnawih thar a nih bakah, a chhuat siamṭhat vek a ni.

House-a thleng, a bikin dormitory hmangtute zingah ruih theih thila fihlîm lo leh house chhung bungrua dîm lo tak tak, faina leh thianghlimna lama hniam tak tak an la tam avangin bungruain a tuar ṭhin a; thla tin House-a thawkte'n tihfai leh siamṭhat hnatlang vawi khat tal an nei ṭhin.

Tun dinhmunah Guwahati Mizoram House-ah hian mikhual thlen theihna building pathum a awm a, pakhat chu sorkar mi pawimawh leh official liante thlenna atana ruahman a ni.