KHAWTHLIR

Cherhlun Branch YMA chuan nimin khan Cherhlun damdawi-inah blood donation camp an huaihawt a, Lunglei Civil Hospital tan thisen unit 50 an pe. Aizawl Two Wheeeler Taxi Association pawhin an din champha pualin nimin khan Aizawl Civil Hospital blood bank-ah thisen unit 35 an pe a, a petute mipa 34 leh hmeichhia pakhat an ni.

Bible Society of India (BSI) associate director atan Dr Hrangthanchhungi lak a ni a, India hmarchhak mi zinga BSI associate director ni hmasa ber a nia thu dawn a ni. BSI-ah department hrang hrang awm zinga pakhat - Church Relations and Resource Mobilization (CRRM)-ah associate director hna a thawk dawn a ni.

Lunglei District Chapchar Kut Organising Committee chu nimin khan DC conference hall-ah co-chairman Lalrotluanga, Lunglei Sub-Hqrs. YMA president hoin an ṭhukhawm a, Chapchar Kut chu Lungleiah chuan February 28 leh March 1-a hman an rêl. A ni khatnaah YMA huaihawtin veng tinah faina hnatlang neih a ni ang a, a ni hnihnaah chuan Ṭhuamluaia Mualah hun hman a ni ang. 

Traffic SP chuan thupek chhuahin, PWD Aizawl Road North Division-in ngenna an siam angin, Chhinga Veng (Bethany) leh Electric Veng (Elim) inkar kawngpui chu vawiin zing dar 9 aṭanga tlai dar 4:30 thleng siam hna thawh a nih dawn avangin, he kawngpuiah hian lirthei tlân a khap.

Information & Public Relations (IPR) minister Lalruatkima chuan nimin khan a pisaah IPR officer-te a kâwm a, department dinhmun leh hmalak meknate a sawipui. Meeting-ah hian, post ruak hnawh khah leh district office-a indaih lohna chungchang te, project an neih mek kalpui dan turte leh thil pawimawh dangte pawh an sawiho a ni. 

ZORO chuan thuchhuah siamin, Transport minister TJ Lalnuntluanga'n Zofate inpumkhatna leh intlawhpawh tawnna atana ṭangkai tur Aizawl aṭanga Churachanpur (Manipur), Jampui (Tripura) leh Tahan (Burma) a bus service tuma hma a la chu lawmawm an tih thu an tarlang.