AMC inthlanah MNF an chak
February 16, 2021-a Aizawl Municipal Corporation (AMC) inthlana vote tlate chu nimin khan Pachhunga University College (PUC)-ah chhiar a ni a, MNF-in seat 11 lain, sorkarna siam turin an chak.
Vote hi chawhma dar 10-ah chhiar ṭan a ni a, harsatna leh buaina thleng awm loin chhun dar 12 velah result hriat kim theih a ni. Thlan tlinte chu thlan tlin an ni tih lantirna certificate hlan nghal zel an ni.
AMC inthlanah hian Indian National Congress (INC), Mizo National Front (MNF) leh Zoram Peoples' Movement (ZPM) party-te chuan ward 19-ah candidate an nei vek a; BJP-in ward pakuaah candidate an nei thung.
MNF party chu ward 11-ah an chak a, an chakna bialte chu - ward I, II, IV, VI, VII, IX, X, XI, XII, XIII leh XVII-te a ni. ZPM-in ward paruk - III, VIII, XIV, XVI, XVIII leh XIX-ah an la a; INC-in ward pahnih - V leh XV an la bawk. BJP-in chakna bial an nei lo.
ZPM aṭanga thlan tlinte hi mipa pakhat leh hmeichhia panga an ni a; INC aṭanga thlan tlinte chu mipa leh hmeichhia pakhat ve ve niin, MNF aṭanga thlan tlinte chu mipa pakua leh hmeichhia pahnih an ni.
Councillor atana thlan tlin zinga naupang ber chu Ward-VIII aṭanga ZPM ticket-a thlan tlin Christina Roluahpuii Sailo niin, kum 26 a ni a; a upa ber chu Ward-II aṭanga MNF ticket-a thlan tlin Lalringliana niin, kum 68 a ni.
In hnehna tlem ber Ward XVI-ah INC candidate Zodingpuii'n amah hnaih bertu ZPM candidate R Lalnunthara chu vote 30-in a hneh. In hnehna sanna ber Ward IV-ah MNF candidate Laltlanzova Khiangte-in amah hnaih bertu ZPM candidate Lalsanglura Ralte chu vote 1,368-in a hneh thung.
MNF-in hnehna an chan zawh lohna ward pasarih zinga parukah pahnihna an ni a, ward pakhatah pathumna an ni. ZPM-in an chak zawh lohna ward 13 zinga pariatah pahnihna an ni a, ward parukah pathumna an ni. INC chuan an tlin zawh lohna ward 17 zinga ward pangaah pahnihna an nih laiin, ward 12-ah pathumna an ni.