KHAWTHLIR

State Election Commissioner (SEC) Laima Chozah chuan nimin khan thuchhuah siamin, Aizawl Municipal Corporation inthlan buatsaih a nih dawn avanga AMC huam chhunga Model Code of Conduct puan chu nimin chawhnu khan hlih a nih thu a tarlang.

Nimin khan Kolasib leh Mamit district-ah Covid-19 laka invenna damdawi (vaccine) pek thawh (dose) hnihna ṭan a ni. Kolasib-ah chuan frontline worker leh healthcare worker mi 76 hnenah pek tura ruahman a ni a, Mamit district-ah pawh frontline worker leh healthcare worker-te hnenah pek a ni bawk.

State Referral Hospital-ah nimin khan Covid-19 vei mi pakhat dah luh a ni a, ani nen mi panga enkawl mek an ni. SRH-ZMC Bulletin tarlan danin, mi panga zinga pakhat chu ICU-ah awmin, ventilator hmanga enkawl mek a ni a, mi dang zawng Isolation ward-ah awmin, harsatna lian tham nei an awm rih lo.

Mamit district-a police officer-te tan nimin khan 'Investigation and Trial of Criminal Cases' tih thupui zirhona leh inràwnkhawmna buatsaih a ni. Training-ah hian JMFC HT Lalmawizuala, Legal-cum-Probation officer Tommy Hmingdailova leh chief judicial magistrate Laldinpuia Tlau ten hriat tur pawimawhte an zirtir a ni.

Aizawl Municipal Corpora-tion huam chhunga lirthei hmanga veivah chungchanga ngaihnathiamna dil turte chuan Coordination Committee on Traffic Management hnenah dil tawh tur a nih thu, Disaster Management & Rehabilitation Secretary chuan nimin khan 

a tarlang.

IPR department leh Mizo Photographers Society-in Valentine’s Day Photo Competition 2021 an buatsaihah nimin khan IPR Director pisaah lawmman sem a ni a, IPR director Lallianpuii'n lawmmante a hlan. Intihsiaknaah hian Lalnunpuia, Tlungvel chu pakhatna niin, Rs. 10,000 a dawng a, pahnihna J Lalṭanpuia, Khawzawlin Rs. 7,000 leh pathumna C Lalberema, Zobawkin Rs. 5,000 an dawng. Mi 10 hnenah consolation prize Rs. 1,000 ṭheuh hlan a ni bawk.