Chief Minister-in councillor tling tharte a lawmpui

Chief minister Zoramthanga chuan nimin khan a Cabinet room-ah thuthar thehdarhtute kâwmin, AMC inthlan neih zawh tâka councillor atana thlan tlinte zawng zawng a lawmpui thu a sawi.

CM Zoramthanga chuan, councillor atana tling tharte a lawmpui rualin, tling zo lote a tawrhpui thu a sawi a, "A tling zo lote pawhin hnualna atan hmang loin, inzirna atana hmang a, an kal leh zelna tur atan hlâwkpui nan hmang turin ka ngen a ni," a ti.

MNF president Zoramthanga chuan, an party seat lak chu lawmawm a tih thu sawiin, "Ruling pawh tam lutuk bik loin, sorkar siam tur atana ṭha tâwk kan nei thei. ZPM pawhin an hmu ṭha. Congress unaute erawh an hmu ṭha vak rih lo a ni," a ti a; sorkarna an siam theih avangin a lawm thu a sawi.

Tun hnai inthlanah an party an chet ṭhat thu sawiin Zoramthanga chuan, "VC/LC leh LADC-ahte kan hnehna a sang viau, tun ṭumah hian sang takin, seat 15-16 te nei ila kan chapo a hlauhawm. Kan chapo lutuk tur Pathianin min vènpuiah ka ngai," a ti.