Councillor ni lai 7 an tling nawn; general ward-ah hmeichhe 2 an tling

Aizawl Municipal Corporation (AMC) inthlan neih zawh takah term liam taa councillor pariat an ding nawn a, pasarih an tling. Pasarih zinga pahnih chu hmeichhia an ni a, general ward-a thlan tlin ve ve an ni.

AMC sorkar liam taa councillor ni ṭhin tling nawnte chu - Ward II-ah Lalringliana (MNF), Ward IV-ah Laltlanzova Khiangte (MNF), Ward V-ah Rosiamngheta (INC), Ward IX-ah B Lalawmpuii (MNF), Ward XI-ah H Zonunsanga (MNF), Ward XII-ah R Thanglura (MNF) leh Ward XV-ah Zodingpuii (INC)-te an ni. Rosiamngheta hi ṭum thum a tlinna a ni a, AMC-ah vawi thum a zawna councillor ni thei awmchhun a ni.

Zodingpuii leh B Lalawmpuii hi kum 2015-a inthlanah hmeichhe tana seat hauh aṭanga thlan tlin an ni a, tun ṭumah hian an ward chu mipa leh hmeichhe tana chuh theih ve ve (general ward) niin, hmeichhe councillor ni lai zinga ding nawn awmchhun an ni.

Tun ṭum inthlanah hian AMC term hmasa ber, kum 2010-2015 chhunga councillor lo ni tawh pahnih an ding leh a, pakhat zawk Lalrinenga Sailo, MNF chu Ward I-ah thlan tlin a ni.