Tun hnaiah two wheeler taxi permit 1,709 pe chhuak

Mizoram sorkarin tun hnaia Aizawl khawpui huam chhunga tlân tur two wheeler taxi permit dil theih a tih hnuah Transport department chuan permit 1,709 an pe chhuak tawh.

Aizawl Traffic hotute hnen aṭanga Vanglaini thu dawn danin, two wheeler taxi permit nei thar zingah sticker (A, B, C, D, E) la chhuak eng emaw zat an awm tawh a, an intlàn chhâwk dan tur erawh chu tihdanglam a la ni lo.

Two wheeler taxi permit pek tharte tan an dinna (taxi stand) tur chungchanga Vanglaini zawhna chhangin AMC hotute chuan, "Parking Committee hi AMC councillor-te hoa din a ngai a, nikum August thla khan parking area tur marking kan ti tawh a, mahse, tuna permit pek thar kaihhnawihah ruahmanna siam a la awm lo," an ti a; councillor thar awm hunah an la ngaihtuah an rin thu an sawi.