Party hrang hrangin lawmthu an sawi

Aizawl Municipal Corporation (AMC) inthlan result puan takah political party hrang hrangte chuan lawmthu sawina thuchhuah (press release) nimin khan an tichhuak.

State-a rorel lai leh AMC inthlana chak ta MNF party chuan, Pathian leh mipui zarah seat 11 lain sorkarna an siam dawn tih sawiin, "Aizawl mipui vote thlaktu zawng zawngte chungah lawmthu kan sawi a, a bik takin MNF sorkar ring tâwka vote hlu tak hlàntute chungah lawmthu kan sawi tak meuh a ni," an ti.

MNF chuan, AMC inthlana hnehna an chang chu chief minister Zoramthanga kaihhruai state sorkar ding mek mipuiin an rin tâwkzia lannaa an hriat thu sawiin, AMC sorkar thar tur chu ṭha taka thláwpa thawhpui turin mipui an ngen a; MNF candidate tling ve zo ta lote an tawrhpui thu an sawi bawk.

ZPM chuan, AMC ward 19 zinga ward paruka ZPM an chak chu lawmawm an tih thu sawiin, "AMC-a vote thlaktu zawng zawng leh ZPM candidate vote-tute zawng zawng hnenah lawmthu kan sawi e," an ti.

ZPM chuan, "AMC inthlan vawi khat kan chuh venaah ward paruk laia hnehna kan chang leh hnehna chan zawh chiah lohna ward eng emaw zatah vote sang tam tak kan hmu hian kum 2023 general election awm turah beiseina sang tak min neihtir a ni," an ti a; AMC inthlan an chuh vawi khatnaa an dinhmun chu ṭha an tih thu an sawi.

An party candidate tling zo ta lote an tawrhpui thu sawiin ZPM chuan, "Engkim hi Pathian remruatah pawm thiamin, hnual mai lo ila. Rorelna dik leh sorkar ṭha din turin a hma aia nasa zawka ṭan laho zel turin kan insáwm a ni," an ti.

MPCC chuan, Aizawl khawpui enkawl tura party hrang hrang aṭanga mipuiin an thlan chhuah councillor-te an lawmpui thu sawiin, khawpui hmasawnna leh chênna nuam din tura thawk tur leh dikna hum turin councillor thlan thar zawng zawngte an chah.

Congress party chuan, kumina AMC inthlanah hmel thar hmuh theiha a awm chu lawmawm an tih thu sawiin, "Mi ṭha leh chhawr tlâk, ram leh hnam tana thawk tur candidate atan dah an ni vek a, kohhran leh NGO-te ngenna leh thawhhona avanga hmasawnna duhawm tak kan hmu hi lawmawm kan ti hle a ni," an ti.

MPCC chuan, an party-in an duh ang hlawhtlinna chang lo mah se, an party candidate zawng zawng an chhuan tak zet thu an sawi a; Congress party tana vote petute zawng zawng hnenah lawmthu an sawi a ni.

PC party chuan, AMC-ah MNF party-in sorkarna siam nawn theia hnehna an chang chu an lawmpui thu sawiin, rorelna dik leh ṭha, mipui sorkar tungding ngei turin duhsakna an hlàn a; tling lote an tawrhpui thu sawiin, beidawng mai lo a, ram leh mipui rawngbawlnaah an thiamna leh theihna hlàn zui zel turin duhsakna an hlan a ni.

AMC inthlanpui hlawhtling taka neih a nih theihna tura State Election Commission-in ruahmanna fel leh inkaihhruaina ṭha tak neia hma an la chu ropui an tih thu PC party chuan an sawi a; dan leh thupek kengkawhtu police-te thawhrimna te, Mizoram Peoples Forum leh tlawmngai pawlte tlawmngaihna leh inpeknate leh thuawih taka inthlan hmachhawntu mipui chungah lawmthu an sawi bawk.