CAB vanga bân kan hreh lo - JV Hluna
BJP, Mizoram Pradesh president Prof. JV Hluna chuan, The Citizenship (Amendment) Bill, 2016 (CAB) chu an duh lo tih sawiin, Parliament-ah pass a nih loh nana ṭawngṭai turin kohhrante an ngen a; a ṭul a nih chuan BJP aṭanga bân an hreh loh thu a sawi.
Prof. JV Hluna hian nimin khan Aizawl Press Club-ah thuthar thehdarhtute a kâwm a; zawhna chhangin, CAB chu duan a nih tirh, kum 2016-ah an duh loh thu central lama an hotute hnenah an thlen tawh thu a sawi a, "Mizoram tan, Mizo mipuite tana ṭha lo tur a nih tak tak chuan kan báng ngam," a ti.
CAB chu Lok Sabha-ah January 8, 2019 khan pass ni tawh mah se, Rajya Sabha-ah erawh a tlang zo rih lo tih sawiin JV Hluna chuan, "Tuna Rajya Sabha session-a ngaihtuah tur zingah pawh telh a ni lo," a ti a; chutih rualin, February ni 7-ah emaw, ni 8-ah emaw joint parliament session-ah sawiho tura dah a nih thu a sawi.
Prof. JV Hluna chuan, tunkara Parliament joint session-ah CAB sawiho tum a nih avangin hun a bichilh tawh hle tih sawiin, "CAB hi kan duh lo tak zet si a, Parliament-in an pass loh nan Mizo mipuite ṭawngṭainaa ṭang turin kan sáwm a ni," a ti.
Mizoram BJP President sawi danin, CAB chu July 19, 2016-ah BJP party-in Lok Sabha-ah an pu lut a, Joint Parliamentary Committee on the CAB-in ngaihdan sawi theihna September 30, 2016 thleng a hawng a ni.
CAB an duh loh thu kum 2016-ah central-ah an thlen tawh nia sawiin JV Hluna chuan, "Hun tiam chhung zawngin Mizoram aiawhtu MP pahnihte'n aw an chhuah lo. Kan sorkar kal ta leh party hruaitute hian an hlau tak tak pawhin a lang lo," a ti.
Mizoram bakah, India hmarchhak state-te'n CAB an duh loh chhan ber chu, Bangladesh aṭanga foreigner lo lut zel duh loh vang nia a lan thu sawiin Prof. JV Hluna chuan, "He Bill hi Pariliament-a sawiho leh a ni hma ngeiin Bangladesh ram hi Bill aṭanga paih turin Mizoram BJP chuan kan ngen tawh a ni," a ti a; Bangladesh paih a nih loh chuan, Bill chu Parliament-ah pu lut tawh lo se an duh niin a sawi.
BJP President chuan, Rajya Sabha MP Ronald Sapa Tlau-in Mizoram mipui lêta tam khawvelah Chakma hnam an awm nia a sawi chu a dik lo tih sawiin, "Bangladesh-a Chakma nuai li âwrh an awm a, Mizoram dep Chittagong Hill Track-ah Chakmna nuai thum bak an awm lo a, khawvel pumpuiah 5,50,000 vel chauh an awm a ni," a ti.
India ramah Chakma nuai chuang âwrh chauh an awm nia sawiin JV Hluna chuan, "Heng zingah hian 10,000 dawn lai Kristian an ni. Kum 2011 chhiarpuiah chuan, CADC-ah hian Zo hnahthlakte tiamin mipui 96,972 an awm," a ti a; Chakmate chu hnam tlém an nia sawiin, chutih laia district council dang bei si loa Mizo mipuiin CADC an mal beih vak chhan chu 'Kristian an nih ve loh vang' nia ngaih theih a nih thu leh, inthlanah erawh political party-te'n Chakmate chu an intlawnsiak thu a sawi.