Champhai-Tahan bus service a nih Theihna atana hma la turin ngen

Transport minister TJ Lalnuntluanga chuan February 4, Thawhṭan­ni khan New Delhi-ah External Affairs minister Sushma Swaraj a kâwm a, Champhai leh Tahan, Myanmar inkara bus service a awm theihna atan hmalakpui turin a ngen. 

Sushma Swaraj chuan, Champhai - Tahan inkara bus service tir chu ram inpawh tawnna atana ṭha tura a ngaih thu sawiin, a hlawhtlin ngei theihna atan Myanmar sorkar hotute a biak nghal tur thu Transport Minister hi a hrilh. 

TJ Lalnuntluanga hian External Affairs Minister hi Zokhawtharah international facilitation centre din a ṭul thu a hrilh a, chumi atana sum leh thawktu mamawh turte a thlen nghal. Sushma Swaraj chuan, tihhlawhtlin a nih theihna atan hma a lak nghal tur thu a sawi a ni.