Robert Romawia'n sorkar laipui hotute a kâwm
New Delhi-a chám mek Sports & Youth Services minister Robert Romawia Royte chuan, February 4, Thawhṭanni leh nimin khan sorkar laipuia thuneitu hrang hrang leh JICA hotu a kâwm.
Robert Romawia hian Thawhṭanni khan Union Housing & Urban Affairs minister a kâwm a, Mizorama sport infrastructure tihhmasawn dan tur te, Aizawl khawpuia fly-over leh lei hnuai kawng (tunnel) siam dan turte sawipuiin, sum mamawhte sorkar laipui leh international funding hmanga hmuh dan tute an sawi dun a ni.
Nimin khan Union Youth Affairs & Sports minister RS Rathore a kâwm leh a; Mizo ṭhalaiten infiamna lama hma an sawn mek dan leh nasa lehzuala hma an sawn theih nan ṭanpui an ngaihnate a hrilh.
Ministry of Tribal Affairs secretary Deepak Khendelkar nena an inkawmnaah Robert Romawia chuan, Tribal Ministry aṭanga infiamna lam tihhmasawn dan tur leh zai leh hnam lâm lama thawhho dan turte a sawipui.
Tourism Minister hian Mizoramin independent a sualna tihchak nana kum 1974-a Mizo tlangval rualin ke ngata Arakan (Myanmar) aṭanga China an kal thlen hriatrengna leh zahna inkhawm, Tourism department-in an buatsaih tura ṭanpuina pe ve tura a ngenna chu Tribal Affairs Secretary chuan tihhlawhtlin a nih tur thu a lo hrilh.
Robert Romawia hian Chief Minister thu angin JICA chief representative Katsuo Matsumoto pawh a kâwm a, JICA puihnaa Aizawl aṭanga Tuipáng thlenga double lane kawng siam chungchang te, JICA puihnaa Aizawl khawpui tihhmasawn dan tur te, sport complex lian tham siam dan tur te, tourism lama hmasawn dan turte leh, leimin leh lei che vanga harsatna sutkian dan turte a sawipui a ni.