Azerbaijan-a India palaiin Governor leh CM a kâwm

India sorkar palai, Azerbaijan-a ambassador ni mek Vanlalvawna, IFS chuan nimin khan Governor Kummanam Rajasekharan leh chief minister Zoramthanga te bakah, minister Dr R Lalthangliana te an pisaah ṭheuh a kâwm a, sorkar thil pawimawh hrang hrang a sawipui.

Governor nen Raj Bhavan-a an inkawmnaah Vanlalvawna chuan, kuminah Azerbaijan khawpui Baku-ah India sorkara Department of Commerce leh Indian Embassy ṭang­kawpin ‘Exhibition - The Best of India Show’ an buatsaih dawn a, India ram chhunga kut themthiam thilte pho chhuak turin exhibitor 70 vel sawm tum a ni a nih thu sawiin, "Mizoram aṭanga hand­loom leh handicraft-te pawh tel dan tur a ngaihtuah zingah a tel," a ti.

Larsap chuan, Vanlal­vawna chu a awmna tur hmun thar Azerbaijan-ah India tan palai ṭha tak a nih theih nan duhsakna a hlan a; Mizote kutchhuak, a bikin handloom leh han­dicraft lam chu pho­chhuah a nih theih nan ṭan la zel turin a chah.

CM Zoramthanga nen a pisaa an inkawmnaah Vanlalvawna chuan, Union Minister of Exter­nal Affairs hmalaknain state hnufual bikte tih­hmasawnna kawng khat atan Indian ambassador-te'n India state chan bik neiin, an awmna ram ṭheuhah an state chante tan inphochhuahna kawngte zawnsak tura beisei an nih thu a sawi a, "Azerbaijan-ah chuan infiamna lamah te, handloom lamahte Mizo tan inphochhuahna remchang a awm," a ti.

Chief Minister chuan, Azerbaijan chu ram hausa tak, contact sport, a bikin boxing-a khawvel hriat hlawh a nih thu sawiin, Mizo ṭhalaite hmasawn theihna turin India ram leh Azerbaijan inlaichinna chu hman ṭangkai ni thei se a duh thu a sawi.

Indian Ambassador hian Commerce & In­dus­tries minister Dr R Lalthangliana pawh a pisaah a kawm. Dr R Lalthangliana chuan, March 7-17, 2019 chhunga Best of India Show-Baku, Azerbaijan rama buatsaih turah Mizoram thil siam chhuah pholan a nih theih nana hma la turin Commerce & Industries department ruat ni se a duh thu a sawi a ni.