NESO/MZP-in national party hotute an dâwr

MZP chuan thuchhuah siamin, The Citizenship(Amendment) Bill, 2016 (CAB) a hlawhtlin lohna turin North East Students' Organisation (NESO)-in hma an la chhunzawm zel a, tun hnai khan India rama political party lian hotute an dawr a, chutah chuan MZP hruaitute pawh an tel tih an tarlang.

MZP tarlan danin, Thawhṭannia All India Congress Committee president President Rahul Gandhi an hmuhnaah CAB-in hmarchhak state-te a nghawng dan tur an sawipui. Rahul Gandhi chuan, NESO hruaitute chu eng ti turin nge amah chu an duh a zawt a; NESO chuan, opposition party lian ber an nih angin, a party leh an lamṭangte hûi khawm a, thukhat vuan a, CAB dodal tura an duh thu an sawi.

Rahul Gandhi chuan, hmarchhak biala ram leilung fate, an nihna leh ṭawngte chu eng thil mahin a tihbawrhbân an phal dawn lo tih sawiin, Assam Accord pawh Congress party-in an thlâwp thu a sawi a ni.

NESO hruaitute chuan Thawhṭanni khan Congress, Trinamool Congress (TMC) leh Janata Dal (United) hruaitute an hmu leh a; TMC MP Prof. Saugata Roy, Joint Parliamentary Committee member ni bawk chuan, TCC-in CAB an duh loh thu te, an party chu hmarchhak mipui lamah an din tlat thu te, Union Home Minister hnenah CAB chu dah bo hlen tawh tura a hrilh thu te, Rajya Sabha-ah CAB an pharh leh pawhin an dodal dawn thute a lo hrilh.

NESO aiawhte chuan February 3, Pathianni khan JDU hruaitu Prasant Kishore an hmu a; Prasant Kishore chuan, Rajya Sabha-ah CAB pharh a nih chuan a dodal zawngin JDU-in vote an thlak ngei dawn thu a lo hrilh. February 3-ah vek BJD MP leh Lok Sabha leader Bhartruhari Mathab an hmu a, ani pawh hian BJD-in CAB an duh loh thu leh vote lak a nih chuan a duh lo zawnga an vote tur thu a lo hrilh a ni.

Pathianni-ah tho khan Meghalaya chief minister Conrad Sangma leh hmarchhak biala political party hrang hrang - AGP, NPF leh INPT hruaitute an kawm a; anni pawh hian CAB an dodal zel dawn thu an sawi a; Rajya Sabha parliamentary leader Sanjay Raut, Shiv Sena spokesperson ni bawk pawh an hmu a ni.

NESO hruaitute'n political party hruaitute an hmuhnaah hian MZP aṭangin NESO fionance secretary Ricky Lalbiakmawia leh MZP vice president Vanlaltana te an tel. MZP chuan, CAB dodal chungchanga BJP thawhpui party lian tak takte chu CAB dodaltu lama ṭang turin an sawm thlu mek zel tih sawiin, "BJP thawhpui party zawng zawng a mal malin hmuh kual tum a ni. BJP thawhpui Hindu nationalist party lian Shiv Sena hotu ber Uddav Thakeray pawh a chenna inah kawm tum a ni," an ti.