Kângmei laka him dan tur sawiho

Serchhip District Level Fire Prevention Committee chu nimin khan district bawrhsap pisa conference hall-ah an ṭhukhawm a, Fire Prevention Week, 2019 hman dan tur te, kumin ṭhál laia kângmei laka inven dan turte leh hmalak dan tur hrang hrang an sawiho.

Meeting-a an rel dan chuan, kumina Fire Prevention Week chu February 11-16, 2019 chhunga hman tur a ni a, Serchhip College-ah hawn a ni ang. 

Week chhungin kawng hrang hrangin awareness buatsaih tur a ni a, ṭhál khawro chhung zawnga kângmei laka kan him theihna tur hmalakna neih tur a ni. Ram kâng ven hna thawk ṭha khua thlan leh tur a ni a, kângmei laka invenna lam hawi thu chhuah ṭha chanchinbu thlan a ni bawk ang.

Lo hâl hun tawp atana State Level Sub Committee-in March 15 a rawt chu khauh taka kenkawh tum a ni a, dái hnai leh lo bing hâl hun atan February thla ral hma ruat a ni. Kângmei laka inven nan dan leh thupek a ṭul ang zela chhuah tura District Magistrate hnenah thlen tum a ni a, ram a kan palha rang taka thuneitute hriattirna tur hmun pathumah siama ni dawn.